د ښار جوړولو او ځمکو سرپرست وزیر د کندهار له والي سره وکتل
د ښار جوړولو او ځمکو سرپرست وزیر محترم محمد جواد پیکار د کندهار له والي محترم حیات الله حیات سره په خپل کار ځای کې ولیدل.
د کتنې په سر کې محترم حیات الله حیات وویل، په ۱۳۹۶ او ۱۳۹۷ کلونو کې اړمنو خلکو لپاره د پنجوايي، میوند، دامان او تخته پل ښارګوټیو تفصیلي پلانونه منظور شوي وو، خو ځمکې یې تر اوسه نه دي انتقال شوي.
نوموړي همدا راز یادونه وکړه چې سېلاب ځپلو لپاره د غازي امان الله خان، حمیدي مېنې، ژېړي ولسوالۍ کې د شهیدانو کورنیو لپاره د ښارګوټي، په پنجوايي کې د معلولینو ښارګوټي او صنعت کارانو لپاره د دامان ښارګوټي د سږني کال په پلان کې شامل دي او د هغو د تفصیلي پلانونو او د ځمکو د انتقال وروستي کېدو غوښتنه وکړه.
ورپسې د ښار جوړولو او ځمکو سرپرست وزیر د کندهار ښار جوړولو او ځمکو ریاست ته دنده وسپارله چې د لومړیو څلورو ښارګوټیو ځمکې دې ښاروالي ته انتقال او د هغو د استفادې لړۍ پیل کړي.
نوموړي همدا راز د ځمکو انتقال ریاست ته دنده ورکړه چې د پنځو نورو ښارګوټو د انتقال وړاندیزونه دې هم کابینې کې د تصویب لپاره چمتو کړي. د ښار جوړولو او ځمکو سرپرست وزیر همدا رنګه د ښاري پروګرام جوړونې عمومي ریاست ته دنده ورکړه چې ژر تر ژره دې د غازي امان الله خان، حمیدې مېنې، د شهیدانو کورنیو، پنجوايي کې د معلولینو او دامان ولسوالۍ کې د صنعت کارانو د ښارګوټو تفصیلي پلانونه دې د منظوري لپاره چمتو کړي.
محترم محمد جواد پیکار همدا راز د کندهار والي د غوښتنې په ځواب کې د دغه ولایت د ښار جوړولو او ځمکو ریاست دنده وسپارله چې د کورنیو بې ځایه شویو بیا مېشتېدنې لپاره د هغو منظم نوملړ چمتو کړي او هغو ته د ښارګوټو جوړولو په موخه دې مناسبې ځمکې تشخیص کړي.
د ښار جوړولو او ځمکو سرپرست وزیر همدا رنګه په ارغنداب او دامان ولسوالیو کې د ښوونکیو لپاره د مشخصو شویو ښارګوټو په تړاو اړوندو برخو ته سپارښتنه وکړه چې د یوه عادلانه میکانیزم له لارې ښوونکیو ته د استوګنیزو نومرو وېش پیل کړي او د هغه عواید دې په زیربنايي خدماتو ولګوي.
نوموړي همدا راز وویل، که څه هم دامان کې د ښوونکیو ښارګوټي ځمکه تر منازعې لاندې ده، خو که چېرې محکمې د شخص په ګټه فېصله وکړه، د ځمکوالۍ چارو تنظیم قانون د احکامو په رڼا کې دې هغه ته د خسارې جبران ورکړل شي.
محترم محمد جواد پیکار په ورته وخت کې د کندهار د ښوونکیو د غوښتنې په ځواب کې د دغه ولایت د ښار جوړولو او ځمکو ریاست ته دنده وسپارله چې په بولدک، پنجوايي او تخته پل کې د نویو ښارګوټو جوړولو لپاره دې د سروې چارې پیل کړي.
د ښار جوړولو او ځمکو سرپرست وزیر په پای کې څرګنده کړه چې د دولتي ځمکو بانک پروګرام په کندهار کې په ښه توګه پر مخ ځي او اړوندو برخو ته یې لارښوونه وکړه چې د څړځایونو د ثبت پروګرام بریالي تطبیق ته دې هم ورته پاملرنه وکړي.
