د ښارجوړولو او ځمکو وزارت سرپرست وزیر محترم محمود کرزي له ارشاد، حج او اوقافو وزیر سره وکتل
په دې لیدنه کې د ارشاد، حج او اوقافو وزیر محترم مولوي عبدالحکیم منیب د جوماتونو جوړولو، مقدسو اماکنو او تاریخي ابداتو د ترمیم او مرمت په برخه کې د ښارجوړولو او ځمکو وزارت له همکارۍ مننه وکړه او وې ویل: د ارشاد، حج او اوقافو وزارت له ۳۰ کلنو را پدیخوا په یو کرايي تعمیر کې خپلې چارې پرمخ وړي چې له ډېرو ستونزو سره مخامخ دی. دا وزارت په لومړي قدم کې، په موقتي ډول یو مناسب دولتي تعمیر ته اړتیا لري څو د اداري کارکوونکو او مراجعینو ستونزې د حل ترڅنګ د دولت له خزانې څخه د کرایې له ورکړې مخنیوی وشي. په دویم قدم کې دا وزارت په کابل ښار کې د دایمي ودانۍ او همداراز د حاجیانو د کمپ جوړولو لپاره پراخې ځمکې ته اړتیا لري.
ورپسې د ښارجوړولو او ځمکو وزارت سرپرست وزیر محترم محمود کرزي له ټولو دولتي او سکټوري ادارو سره په همکارۍ او همغږئ د ټینګار ترڅنګ؛ د خصوصي سازۍ چارو معینیت ته هدایت ورکړ څو په زنبق څلور لارې کې هغه دولتی ملکیت چې د کورنیو چارو وزارت د ځانګړو قطعاتو له استفادې خلاصېږي، په موقعت ډول د ارشاد، حج او اوقافو وزارت په واک کې ورکړي.
د ښارجوړولو او ځمکو وزارت سرپرست وزیر همداراز اړونده مسولینو ته دند وسپارله چې مرنجان تپې ته څېرمه د هغې ۵ جریبه سپینې دولتي ځمکې د تثبیت او همداراز ارشاد، حج او اوقافو وزارت ته یې د انتقال لپاره عملي اقدامات ترلاسه لاندې ونیسي.
د ښارجوړولو او ځمکو وزارت سرپرست وزیر څرګنده کړه چې دا وزارت په ولایاتو او مرکز کې د جوماتونو د جوړولو لپاره د هر ډول سپینې دولتي ځمکې د انتقال په برخه کې له ارشاد، حج او اوقافو وزارت سره هر ډول همکارۍ ته چمتو دی.
د دې لیدنې په پای کې دواړو لورو په لا ډېرو همکاریو، د ګډو فعالیتونو په ګړندیتوب او همداراز خلکو ته د غوره خدمتونو په وړاندې کولو ټینګار وکړ.
###
