د پارون ښار تفصيلي پلان منظور شو
د ښار جوړولو او ځمکو وزارت سرپرست محترم محمد جواد پيکار د نورستان له والي محترم حافظ عبدالقيوم او په ملي شورا کې د دغه ولایت له استازو سره په خپل کار ځای کې ولیدل.
په پيل کې د نورستان والي دې ولايت ته د ښار جوړولو او ځمکو وزارت د رهبرۍ له ځانګړې پاملرنې مننه وکړه او په ياد ولايت کې يې د بېلابېلو پروژو پر تطبيق په ځانګړي ډول د عمراني شپږو پروژو د ساختماني چارو، د معلمينو او شهيدانو لپاره د استوګنې نومرو د وېشلو او په تازه جوړولو شويو ودانيو کې د مرکزګرمۍ سيسټم د نصبولو په تړاو يې خبرې وکړې.
ورپسې محترم محمد جواد پيکار اړوندو برخو ته سپارښتنه وکړه چې په نورستان کې د ځمکې د کمښت له امله؛ د مهترلام له ښاروالۍ سره په همغږۍ دې د معلولينو او شهيدانو لپاره د ۶ زره استوګنيزو نمرو ځمکه په لغمان کې ځانګړې شي.
د ښار جوړولو او ځمکو وزارت سرپرست وويل د ولايت اداري ودانۍ، د ولايت ميلمستون، څارنوالۍ، د ښځو چارو رياست، ورزشي امريت او د ولايتي شورا د ودانيزو پروژو د چارو بشپړېدل يو ښه پرمختګ دی او په نږدې راتلونکي کې به ګټې اخېستنې ته وسپارل شي.
محترم محمد جواد پيکار په ورته وخت کې د نورستان والي د وړانديزونو په تړاو په ياد ولايت کې د ښار جوړولو او ځمکو رياست ته سپارښتنه وکړه چې د پارون طبيعي پېښو د مخنيوي او په يادو ساختمانونو کې د مرکزګرمۍ سيسټم نصبولو لپاره تخنيکي سروې ترسره کړي.
د ښار جوړولو او ځمکو وزارت سرپرست همدارنګه د نورستان د ښار جوړولو او ځمکو رياست ته سپارښتنه وکړه چې تر دې وروسته دې د ځايي مهندسي سبک او ځايي ساختماني موادو ته په پام سره د ساختماني پروژو ډيزاين په خپله ترسره کړي او د منظورۍ په موخه دې مرکز ته راواستوي.
محترم محمد جواد پيکار زياته کړه چې د نورستان ولايت لپاره به د خطيب العالمي نړيوالې کمپنۍ د قراداد له مخې روښانه نقشه او ليدلوری رامنځته شي چې وروسته به يې عملي چارې هم ترسره شي.
د ښار جوړولو او ځمکو وزارت سرپرست د يادې ليدنې په څنډه کې د پارون ښار تفصيلي پلان چې د لومړي ځل لپاره په ۶۰۹ جريبه ځمکه کې ترتيب او د ښاري پراختيا عالي شورا په جلسه کې تائيد شوی؛ منظور کړ او د تطبيق لپاره يې اړوندو برخو ته وسپاره.
محترم محمد جواد پيکار زياته کړه چې دا تفصيلي پلان خپلې ګټې لري، خو د نړيوالې کمپنۍ په وسيله د نورستان روښانه ليدلوری او د نقشې ترتيبول يو څه زيات وضاحت ته اړتيا لري.
د يادولو ده چې په دې تفصيلي پلان کې ۴۲ فعاليتونه په ځانګړي ډول د کرکټ لوبغالي، موزیم او د سيلانيانو لپاره د استوګنيزو بلاکونو جوړول ځای پر ځای شوي دي.
