د پارلمان د شهیدانو هدیرې ودانۍ پرانېستل شوه
د ښارجوړولو او ځمکو سرپرست وزیر محترم محمد جواد پیکار د ولسي جرګې دویم مرستیال محترم امیر خان یار، د ولسي جرګې د چاپېریال ساتنې کمېسیون رئیس خان محمد وردګ او د ملي شورا ځینو وکیلانو په حضور کې د پارلمان د شهیدانو هدیرې ودانۍ پرانېستله.
په همدې مناسبت جوړیو شویو مراسمو کې د تاریخي ابداتو د مرمت او ترمیم ملي ادارې رئیس ښاغلي فرهاد بیات د دې ودانۍ د جوړېدو د څرنګووالي او تخینکي موضوعاتو په اړه معلومات وړاندې کړل.
ورپسې د ښارجوړولو او ځمکو سرپرست وزیر محترم محمد جواد پیکار په ولسي جرګه کې د خلکو له استازیو په مننې سره زیاته کړه، دا ودانۍ د تیموریانو دورې د معمارۍ په سبک پر ۶۸۴۸ متر مربع ځمکې ډیزاین او په پاخه او اساسي ډول جوړه شوې ده.
د ښارجوړولو او ځمکو سرپرست وزیر زیاته کړه، په دې وزارت کې اوسمهال د انجنیرۍ او مهندسۍ په برخه کې ظرفیت رامنځته شوی چې په بریالۍ توګه د دې پروژې ډيزاین او پيلي کېدل یې ښکاره بېلګه ده.
له هغه وروسته د ولسي جرګې دویم مرستیال محترم امیر خان یار، د دې پروژې په تطبیق کې د ښارجوړولو او ځمکو وزارت له کړنو د مننې تر څنګ د دې ودانۍ سبک وستایه.
په ترتیب سره، د ملي شورا په تېره دوره کې د کابل د خلکو استازي سید علي کاظمي وویل، دا پروژه د ښارجوړولو او ځمکو وزارت او نورو ښکیلو ادارو په دوامداره هڅو بشپړه شوې ده.
د یادو مراسمو په پای کې محترم محمد جواد پیکار، د ملي شورا وکیلانو او ګډونوالو د پارلمان شهیدانو او د هېواد نورو شهیدانو روح ته دعا وکړه.
د پارلمان د شهیدانو هدیرې ودانۍ د ښارجوړولو او ځمکو وزارت د تاریخي ابدو د ترمیم او مرمت ملي ادارې له لوري د ۲۸ مېلیونه افغانیو په ارزښت جوړه شوې ده.
د پارلمان د شهیدانو هدیره د کابل ښار په شپږمه ناحیه کې د دارالمان ماڼۍ تر څنګ موقعیت لري چې د جوړېدو چارې یې په ۱۳۹۴ کال کې پیل او د ۱۳۹۸ کال د لیندۍ مېاشتې په ۵ مه نېټه پای ته ورسېدې.
