د نوي کابل ښار لپاره برېښنایي سیستم معرفي او تشریح شو
۱۴۴۷/۷/۲۳
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ، د نوي کابل ښار لپاره د نوي جوړ شوي برېښنایي سیستم د معرفي او تشریح غونډه ترسره شوه.
په دغه غونډه کې د یاد وزارت محترم مالي او اداري مرستیال الحاج محمد ارسلاح خروټي، د همدغه وزارت د ښاري چارو محترم مرستیال شیخ مدارعلي کریمي بامیاني، د وزارت اړوندو ریاستونو محترمو رئیسانو، مسؤلینو، د مخابراتو او معلوماتي ټکنالوجۍ محترم وزارت متخصص مسؤلینو او په نوي کابل ښار کې د پراختیا ورکوونکو شرکتونو مسؤلینو او استازو برخه اخیستې وه.
د کور او ښار جوړولو وزارت محترم وزیر الحاج مولوي نجیب الله حیات حقاني وویل، دغه کړنه او ابتکار یې د چارو د مدیریت، روڼتیا، چټکتیا او د اغېزمنو خدماتو وړاندې کولو په موخه ترسره کړ.
ښاغلي وزیر وویل، په دغه سیستم کې به د نوي کابل ښار اړوند ټولو معاملو، د نمرو ثبت، د چارو سمون او نورو موضوعاتو کې بشپړ ډاډ رامنځته شي.
د نوي سیستم د معرفي په غونډه کې، د مخابراتو او معلوماتي ټکنالوجۍ محترم وزارت اړوند متخصصینو وویل، یاد سیستم په درې ژبو، پښتو، دري او انګلیسي ترتیب شوی، چې د کور او ښار جوړولو وزارت، پراختیا ورکوونکي شرکتونه او عام خلک به ورته اسان لاسرسی ولري.
دوی وویل، د دې سیستم سره به د کور او ښار جوړولو وزارت د پراختیا ورکوونکو شرکتونو او پیرودونکو ترمنځ د هرې معاملې څخه معلومات ترلاسه کوي، د ځمکو مشخصات، اندازه، نښې او کوډونه به معلوم وي او په ټوله کې به هراړخیزه روڼتیا رامنځته شي.
د ملکیت سندونه به سیستم ورکوي، چې له مخې به یې محترم محاکم شرعي قبالې اجراء کوي.
دغه نوی جوړ شوی سیستم په لومړني حالت کې دی او لا یې هم د غني کېدا په موخه بې درېغه هڅې روانې دي.
محترم وزیر الحاج مولوي نجیب الله حیات حقاني، د مخابراتو او معلوماتي ټکنالوجۍ وزارت له محترمو متخصصینو د زړه له کومې مننه وکړه، چې په دغه چاره کې یې د کور او ښار جوړولو له وزارت سره بشپړه همکاري وکړه.
