د ننګرهار ولایت په سره رود ولسوالۍ کې د مهاجرینو لپاره د ښارګوټي اصلاحي تفصیلي پلان منظور شو
۱۴۴۷/۱۰/۲۸
د کور او ښار جوړولو وزارت محترم وزیر الحاج مولوي نجیب الله حیات حقاني، د ننګرهار ولایت په سره رود ولسوالۍ کې د مهاجرینو د ښارګوټي اړوند اصلاحي تفصیلي پلان منظور کړ.
یاد اصلاحي تفصیلي پلان چې په دقیقه توګه مطالعه او د ساحې سره په همغږۍ اصلاح شو په 1006.6 جریبه ځمکه کې جوړېږي، چې 1289 استوګنیزې نمرې لري.
تر دې وړاندې د هېواد په کچه د مهاجرینو د ټو ښارګوټو تفصیلي پلانونه داسې ډیزاین شوي وو، چې په کې پنځه بسوه یي، لس بسوه یي او پنځلس بسوه یي نمرې شاملې وې او یوازې هغه راستنېدونکو مهاجرو کورنیو ته ورکول کېدې، چې افغانستان کې یې ځمکه نه درلوده، کور یې نه درلود او نه یې هم اقتصادي وضعیت دومره پیاوړی و، چې ځان ته مناسبه سرپناه برابره کړي.
اوس دغه چاره، د اسلامي امارت د زعیم عالیقدر امیرالمؤمنین حفظه الله تعالی و رعاه د حکم سره سم ټولې نمرې پنځه بسوه یي شوې او هرې راستنېدونکې مهاجرې کورنۍ ته ورکول کېږي.
پر همدې بنسټ، اړتیا ده چې د ټولو ولایتونو اړوند د مهاجرینو د ښارګوټو تفصیلي پلانونه اصلاح شي او یو ځل بیا د تطبیق لپاره اړوندو مراجعو ته وسپارل شي.
په دې لړ کې د ننګرهار ولایت د سره رود ولسوالۍ اړوند د مهاجرو د ښارګوټي تفصیلي پلان هم اصلاح او د محترم وزیر الحاج مولوي نجیب الله حیات حقاني له لوري تائید او لاسلیک شو.
