د نانکچي ښارګوټي د څېړنې بهیر بشپړ شو
۱۸/۰۶/۱۴۴۷
د کور او ښار جوړولو وزارت د ښاري چارو د محترم مرستیال شیخ مدارعلي کریمي بامیاني په مشرۍ ګومارل شوې کمېټې د کابل ښار افشار سیمه کې د افغان سرې میاشتې د نانکچي ښارګوټي د څېړنې کار بشپړ کړی دی.
یاده کمېټه چې د عدلیې وزارت، د اداري چارو د عمومي ریاست، د فرمانونو او احکامو د څارنې او تعقیب عمومي ریاست، د کرنې، اوبولګولو او مالدارۍ وزارت، د افغان سرې میاشتې جمعیت او د کابل ښاروالۍ د استازو څخه جوړه ده، د کور او ښار جوړولو وزارت د ښاري چارو د محترم مرستیال تر مشرۍ لاندې فعالیت کوي.
په هغه غونډه کې چې د ښاري چارو د معینیت په دفتر کې جوړه شوې وه، د دې څېړنې راپور په پوره دقت او هر اړخیز ډول وڅېړل شو.
محترم شیخ مدارعلي کریمي بامیاني وویل چې د امیرالمؤمنین حفظهالله د حکم پر بنسټ، چې د نانکچي ښارګوټي کې د ۸۴ قطعو ځمکو د وېش د څېړنې په اړه صادر شوی، کمېټې خپل کار پیل کړ او د ساحوي کتنو او اسنادو پر بنسټ یې یو مفصل معلوماتي راپور ترتیب کړی دی.
په دې څېړنه کې د ښارګوټي د وضعیت هر اړخیز تحلیل، د ځمکو د وېش څرنګوالی، د ښارګوټي له پلان او نقشې سره د موافقت یا عدم موافقت ارزونه، د ځمکې حقوقي تحلیل او د ښارګوټي تخنیکي ارزونه په مفصل ډول تر سره شوې ده.
همدارنګه هغه ستونزې چې په تخنیکي، مالي، حقوقي او اداري برخو کې د پخوانۍ ادارې په دوره او اوس وخت کې موجودې وې، هم ارزول شوې دي.
په تخنیکي برخو کې ښاري سرغړونې هم شوې دي؛ لکه د ښارګوټي ځینې سیمې چې باید د شنو ساحو، ماشومانو د روزنتون، پارک او سیلبندونو لپاره ځانګړې شوې وې، په غیرقانوني توګه په استوګنیزو نمرو بدلې شوې دي، چې دا ټول موارد ارزول شوي دي.
پریکړه وشوه چې یاد راپور، چې د ښارګوټي د تخنیکي او حقوقي ستونزو تحلیل، او لنډمهاله او اوږدمهاله حل لارې او وړاندیزونه لري، د امیرالمؤمنین حفظهالله حضور ته د لازم تصمیم او هدایت لپاره وړاندې شي.
