د مس عینک کان د ځمکې د انتقال په موخه تخنیکي سروې ترسره شوه

۱۴۴۷/۲/۱۰

لوګر ولایت کې د کور او ښار جوړولو ریاست محترم رئیس مولوي مطیع الله زاهد وایي،  د مس عینک کان قراردادي شرکت MCC  ته د لس زره او پنځه سوه (۱۰۵۰۰) جرېبه ځمکې د انتقال په موخه تخنیکي سروې ترسره شوه.

ښاغلی مولوي زاهد وایي، په دې سره به د ځمکې تخنیکي ارزونه، د بیې ټاکنه او د یادې پراخې ځمکې د انتقال عملي چارې پيل شي.

نوموړی وایي، یاده ځمکه به د شرکت له لوري د اوبو د زېرمه کولو، استوګنې، او د مس عینک کان له غیر ګټورو موادو د ذخیرې لپاره ځانګړې شي.

دا سروې د کانونو او پټرولیم وزارت په رسمي غوښتنه ترسره شوې، او ټاکل شوې ده چې تر بشپړې ارزونې وروسته، یاده ځمکه شرکت ته په قانوني ډول وسپارل شي.

د سروې په لومړي پړاو کې، په حصار تنگي سیمه کې دوه زره  (۲۰۰۰) جرېبه ځمکه سروې او تثبیت شوه، او د پاتې سیمو د سروې چارې لا هم روانې دي.