د مزارشریف د مبارکې روضې د مرمت او ترمیم چارې پيل شوې

په همدې مناسبت جوړو شویو مراسمو کې چې د بلخ والي، د دې ولایت اداري هئيت، د ښارجوړولو او ځمکو وزارت د ساختماني چارو معین، د دې وزارت رئيسانو او مسولینو، دیني عالمانو، قومي مخورو او د ولایتي شورا استازو پکې ګډون کړی و، د مزارشریف مبارکې روضې دترمیم او مرمت چارې پيل شوې.

په دې مراسمو کې لومړی، د بلخ والي محترم محمد اسحاق رهګذر خبرې وکړې او د تاریخي ابدو ترمیم او مرمت د تاریخي ارزښتنو د ساتنې په برخه کې مهم یاد کړ‌، د ښارجوړولو او ځمکو وزارت له همکارۍ او د جلالتماب ولسمشر له ځانګرې پاملرنې مننه وکړه او همداراز د دې پروژې په تطبیق کې یې د هر‌‌‌‌‌‌ډول همکارۍ ‌‌‌‌‌‌ډا‌‌‌‌‌‌ډ ورکړ.

ورپسې د ښارجوړولو او ځمکو وزارت د ساختماني چارو معین محترم سید نسیم خلیق خبرې وکړې او زیاته یې کړه، د خوشحالۍ ځای دی چې د جلالتماب ولسمشر په هدایت یې نن د مزار شریف مبارکې روضې د مرمت او ترمیم چارې پيل کړې.

د ساختماني چارو معین همداراز زیاته کړه چې د مبارکې روضې ترمیم او مرمت، مزار شریف خلکو ته د جلالتماب ولسمشر ژمنه وه چې نن عملي کېږي.

نوموړي د خپلو خبرو په جریان کې زیاته کړه، چې جلالتماب ولسمشر په تدارکاتو کمیسیون کې د مبارکې روضې د ترمیم او مرمت په منظورۍ سره، په ټاکلي وخت، په ښه کیفیت د یادې پروژې د تطبیق هدایت ورکړی او ښارجوړولو او ځمکو وزارت د جلالتماب ولسمشر د دې هدایت عملي کېدو ته ژمن دی.

‎محترم سید نسیم خلیق په پای کې زیاته کړه چې د تاریخي آبدو د مرمت او ترمیم ملي ادارې له لارې د هېواد تاریخ او فرهنګ ودې لپاره بنسټز ګامونه پورته کړي چې د مبارکې روضې ترمیم او مرمت یې ښکاره بېلګه ده.

ورپسې، د ښارجوړولو او ځمکو وزارت د تاریخي آبدو ترمیم او مرمت ملي ادارې رئیس محترم علي فرهاد بیات د دې پروژې د بېلابېلو برخو په اړه معلومات ورکړل او زیاته یې کړه د مبارکې روضې په ترمیم کې د احاطې دیوال، دروازو، تشنابونو، د اوبو حوضونو، پلي لارو، د تېږو فرش او د اوبو زیرمې جوړول هغه مهم موارد دي چې په دې پروژه کې به ورته ځانګړی پام وشي.

ښارجوړولو او ځمکو وزارت د جلالتماب ولسمشر د هدایت له مخې، د مبارکې روضې د ترمیم او مرمت چارې د 119 میلیونه افغانیو په ارزښت پیل کړي او ژمن دی چې دا تاریخي ابده په اساسي ډول ترمیم او ورغوي.

###