د متحده عرب اماراتو ښارګوټي ستونزې به ډېر ژر حل شي
۱۴۴۳/۱۰/۲۴
د ښار جوړولو او ځمکو وزارت محترم سرپرست مولوي حمدالله نعماني د کابل قصبې سیمه کې د متحده عرب اماراتو ښارګوټي له اوسېدونکو سره وکتل او د دغه ښارګوټو پر ستونزو او حل لارو یې خبرې وکړې.
په ناسته کې د متحده عرب اماراتو ښارګوټي اوسېدونکو د تخنیکي ستونزو سربېره د منظم لوبغالي، روغتیایي کلېنیک، ښوونځي، د څښلو اوبو، شنې ساحې او نورو اسانتیاو له کمښت شکایت وکړ او ټینګار یې وکړ چې یاد بلاکونه د متحده عرب اماراتو لخوا په بلاعوضه توګه جوړ شوي، خو مخکیني دولت دوی ته په اوږدمهاله قسطونو ورکړې دي چې دوی په دې برخه کې د پاتې پیسو د معافیت غوښتنه وکړه.
ورپسې د ښار جوړولو او ځمکو وزارت ښاغلي سرپرست مولوي حمدالله نعماني د یاد ښارګوټي اوسېدونکو ته یادونه وکړه، چې وزارت یې دنده لري تر څو د ښارګوټو فني او تخنیکي ستونزو ته رسېدنه وکړي او د حل برخه کې یې لازم اقدامات وکړي.
ښاغلي مولوي نعماني زیاته کړه وزارت به یې د قانون سره سم د متحده عرب اماراتو د ښارګوټي اوسېدونکو ستونزو د حل برخه کې ګامونه پورته کړي او په دغه برخه کې به ټولې اړوندې ادارې په جریان کې واچوي.
وزیر مولوي حمدالله نعماني راغلو کسانو ته وویل، چې د پاتې پیسو د معافیت موضوع د ښار جوړولو او ځمکو وزارت له صلاحیت پورته خبره ده.
