د لوګر ولایت لپاره ترتیب شوی ماسټر پلان د تائید اخیستلو لپاره وړاندې شو
۱۴۴۷/۰۳/۲۰
د کور او ښار جوړولو وزارت د محترم وزیر الحاج مولوي نجیب الله حیات حقاني حضور ته، د لوګر ولایت لپاره ترتیب شوی ماسټر پلان وړاندې شو.
دغه ماسټر پلان، د دغه وزارت د ملي جامع پلان ریاست محترم رئیس انجنیر رحمت الله قدیري او مل تخنیکي ټیم له لوري یې د یو پرزنټېشن له لارې وړاندې شو.
د ترتیب شوي پلان د وړاندې کولو پر مهال د ملي جامع پلان ریاست محترم رئیس انجنیر رحمت الله قدیري او نورو مسئولینو د ماسټر پلان په اړه هر اړخیز معلومات وړاندې کړل، چې په کې د ښاري پراختیا، ښاري چوپړتیاوو، د استوګنې اسانتیاوو او د ښار د اوږدمهاله اړتیاوو په اړه وضاحت ورکړل شو.
محترم وزیر په خپلو څرګندونو کې، د پلان د ارزښت، اهمیت او تطبیق په اړه خبرې وکړې او د لا زیات دقت او د نظرونو د راټولولو خبره یې وکړه.
محترم وزیر وویل، یاد ماسټر پلان به له بشپړ دقت او ټولو اړخونو تر پاملرنې وروسته تائید کړي او د منظورۍ لپاره به یې د ریاسة الوزرا محترم عالي مقام ته وړاندې کړي.
دغه پلان به تر تائیدۍ او منظورۍ وروسته د لوګر ولایت د ښاروالۍ محترم ریاست ته وسپارل شي، چې د تطبیق او منظمې ښاري پراختیا لپاره ترې اغېزمنه ګټه پورته کړي او له مخې به یې ګڼ شمېر سهولتونه رامنځته شي.
ماسټر پلان د ښارونو د منظمې ودې او د راتلونکو اړتیاوو د پوره کولو لپاره یو بنسټیز سند دی، چې د کور او ښار جوړولو وزارت د هېواد د بېلابېلو ولایتونو لپاره د ماسټر پلانونو پر جوړولو او تطبیق کار کوي، څو ښارونه د عصري معیارونو پر بنسټ پرمختګ وکړي او خلکو ته د ژوند غوره چاپېریال برابر شي.
