د لوګر ولایت د یو شمېر سړکونو د جوړولو له چارو څخه څارنه ترسره شوه
۱۴۴۸/۱/۶
د لوګر ولایت د کور او ښار جوړولو ریاست د انجینري او نظارتي ټیم له لوري د لوګر، میدان وردګ ولایتونو د نښلوونکي سړک د دوهمې برخې او همدارنګه د لوګر ولایت په پایخېلو سیمه کې د سړک او پلچکونو د جوړولو له چارو څخه نظارت ترسره شو.
د لوګر، میدان وردګ نښلوونکي سړک دوهمه برخه ۱۴.۱ کیلومتره اوږدوالی لري چې د کلنگار، شولک او بابوس سیمو څخه تېرېږي او تر پُل علم ښار پورې غځېدلی دی.
د دې برخې د جوړولو چارې په چټکۍ سره روانې دي او تر دې مهاله یې ۷۱ سلنه فزیکي پرمختګ کړی دی.
همدارنګه د همدې سړک لومړیۍ برخه ۱۷.۴ کیلومتره اوږدوالی لري چې د میدان وردګ ولایت د تنگې درې له امیر قلا څخه پیل او د لوګر ولایت تر کلنگار سیمې پورې رسېږي. د دې برخې د رغونې چارې هم دوام لري او تر اوسه ۵۷ سلنه فزیکي پرمختګ پکې ثبت شوی دی.
د یادو پروژو د بشپړېدو سره به د لوګر او میدان وردګ ولایتونو ترمنځ د تګ راتګ اسانتیاوې زیاتې، د سفر وخت او لګښتونه کم، او د سوداګرۍ او کرنیزو محصولاتو د انتقال بهیر لا ګړندی شي.
له بلې خوا، د لوګر ولایت د مرکز اړوند په پایخېلو سیمه کې د ۱ کیلومتره سړک او ۲ پلچکونو د جوړولو چارې هم ۹۵ سلنه بشپړې شوي دي.
د دې پروژې ټولیز لګښت ۲ میلیونه او ۲۶۱ زره افغانۍ دی چې د پُل علم ښاروالۍ له بودیجې څخه تمویلېږي.
د دې پروژې په بشپړېدو سره به د سیمې د اوسېدونکو ګڼې ستونزې حل شي.
