د لوګر ولایت د مهاجرینو د ښارګوټي تفصیلي پلان منظور او لاسلیک شو
۱۴۴۷/۸/۵
د کور او ښار جوړولو وزارت محترم وزیر الحاج مولوي نجیبالله حیات حقاني، په خپل کاري دفتر کې د لوګر ولایت د مهاجرینو د ښارګوټي لپاره ترتیب شوی تفصیلي پلان په رسمي ډول لاسلیک او منظور کړ.
یاد پلان د (۷۰۰) جریبه دولتي ځمکې پر مخ ډیزاین شوی، چې په کې د منظمې ښاري پراختیا له اصولو سره سم (۱۰۲۶) استوګنیزې نمرې شاملې دي.
دغه ښارګوټی به د راستنېدونکو مهاجرو د استوګنې د دایمي ستونزې د حل په موخه جوړ شي.
د منظور شوي پلان له مخې، ښارګوټی به بنسټیزې اسانتیاوې لکه د استوګنې منظمې نمرې، داخلي سړکونه، شنې ساحې، د جوماتونو، ښوونځیو، روغتیايي مرکزونو او عامه خدمتونو لپاره ځانګړې شوې ساحې ولري، څو مېشتېدونکو ته یو مناسب او معیاري ښاري چاپېریال برابر شي.
د عالیقدر امیرالمؤمنین حفظهالله تعالی د ځانګړي حکم له مخې، هرې مهاجرې کورنۍ ته به (۵) بسوې استوګنیزه نمره ورکول کېږي، چې دا چاره د اسلامي امارت د مشرتابه له لوري د مهاجرینو د عزتمندانه بیا مېشتېدو او ټولنیز ثبات د ټینګښت څرګندونه کوي.
د دې پلان له منظورېدو وروسته به د تطبیق عملي چارې د اړوندو ادارو په همغږۍ، د امکان تر حده په چټک او منظم ډول پیل شي، تر څو له یاد ښارګوټي څخه پر وخت ګټه واخیستل شي.
