د فراه ښار په ځینو ناحیو کې د ودانیزو چارو له بهیر څارنه وشوه
۱۴۴۷/۹/۱۲
فراه ولایت کې د کور او ښار جوړولو محترم ریاست تخنیکي ټیم له لوري، د دغه ولایت د ښار په پنځمه، شپږمه او اوومه ناحیه کې د څار بهیر ترسره شو.
یاده څارنه د کور او ښار جوړولو وزارت، له ښآري سرغړونو د مخنیوي او د انکشافي پروژو پر تطبیق د څار محترم عمومي ریاست په همغږۍ ترسره شوه، چې په کې د ښاري پلانونو پر بشپړ رعایت ټینګار شو.
د فراه د کور او ښار جوړولو ریاست تخنیکي ټیم، په یادو ناحیو کې د هغو ساحو څارنه وکړه، چې ودانیزې چارې په کې روانې وې.
د څارنې په بهیر کې، معلومه شوه، چې تر دې دمه روانې ودانیزې چارې د ښار د تفصیلي پلانونو سره په ټکر کې نه دي.
دغه راز، د عامه پوهاوي په موخه د ودانیو مالکینو ته اړوندې لارښوونې او معلومات وړاندې شول او په واضح ډول یې تشریح وشوه.
د کور او ښار جوړولو وزارت ټینګار کوي، چې د ښار د منظم پرمختګ او د ښاري نظم د ساتنې لپاره، ټول ودانیز کارونه باید د تفصیلي پلانونو مطابق او په معیاري ډول ترسره شي.
