د فراه ولایت د مهاجرینو ښارګوټي په اصلاحي پلان کې ۴۲۷۷ استوګنیزې نمرې تنظیم او تائید شوې
۱۴۴۸/۱/۵
د کور او ښار جوړولو وزارت د محترم وزیر الحاج مولوي نجیب الله حیات حقاني له لوري د فراه ولایت د مهاجرینو ښارګوټي اصلاحي پلان له تخنیکي ارزونې وروسته تائید او په رسمي ډول لاسلیک شو.
یاد اصلاحي پلان د راستنېدونکو مهاجرو د دایمي مېشتېدنې، د ښاري خدمتونو د منظم تنظیم او د استوګنیزو سیمو د معیاري پراختیا په موخه ترتیب شوی، چې د پلي کېدو له لارې به زرګونو کورنیو ته د مناسبې سرپناه او بنسټیزو ښاري اسانتیاوو د برابرولو زمینه برابره شي.
د پلان له مخې، د فراه ولایت د مهاجرینو ښارګوټي په اصلاحي پلان کې ۴۲۷۷ استوګنیزې نمرې تنظیم او په پام کې نیول شوې دي.
په دغه پلان کې د استوګنیزو ساحو تر څنګ د سړکونو شبکې، عامه تاسیساتو، شنو ساحو، تعلیمي او روغتیايي خدمتونو او نورو اړینو ښاري اسانتیاوو لپاره هم مناسبې ساحې ځانګړې شوې دي.
تمه کېږي چې د یاد اصلاحي پلان په پلي کېدو سره به د فراه ولایت د مهاجرینو ښارګوټی په یوه منظم او معیاري استوګنیز ښارګوټي بدل شي او د راستنېدونکو کورنیو د مېشتېدنې لپاره به لا غوره شرایط رامنځته شي.
