د غیرپلاني سیمو د بهسازۍ درې پلانونه ویزه او ولایتونو ته د تطبیق لپاره واستول شول
۱۴۴۷/۰۵/۲۵
د کور او ښار جوړولو وزارت د غیرپلاني سیمو د بهسازۍ ریاست وایي چې د هېواد د ښارونو د غیرپلاني ساحو لپاره درې بیارغونې پلانونه طرحه شوي او د عملي کېدو لپاره اړوندو ولایتونو ته سپارل شوي دي.
د ښار جوړولو او بهسازۍ د عمومي ریاست سرپرست، محترم ډاکټر احمد رضایي، څرګنده کړه چې دغه درې ویزه شوي پلانونه د فاریاب ولایت د میمنې ښار د شپږمې ناحیې د قطور ساحې، د فراه ښار د څلورمې ناحیې لوېدیځې برخې، او د بلخ ولایت د مزارشریف ښار د نهمې ناحیې د ابوایوب انصاري سیمې پورې تړاو لري.
نوموړي وویل چې د قطور ساحې لپاره د کانالیزېسیون شبکې او د اوبو رسولو پلان، او د کاري احجامو لست هم ترتیب او براورد شوي دي.
ډاکټر رضایي زیاته کړه، چې د فراه ښار د عسکرآباد او قلعه موزیک غیرپلاني سیمو، او د بادغیس ولایت د قلعه نو ښار د لومړۍ، دوهمې او څلورمې ناحیو د بهسازۍ پلانونه ۸۵ سلنه بشپړ شوي او ډېر ژر به بشپړ شي.
هغه وړاندې وویل چې د کندهار ښار د چوني غیرپلاني سیمه او د نیمروز ولایت د زرنج ښار لومړۍ ناحیې ساحې (حاجي خلیل، مهاجرآباد، خیرآباد او نفس خان) هم سروې شوي او د بهسازۍ د پلان لپاره د کروکي او توپوګرافۍ کارونه پرې ترسره شوي دي.
د کور او ښار جوړولو وزارت په وینا، دغه پلانونه د ښارونو د غیرپلاني سیمو د اړتیاوو، د نفوسو د تراکم، ښاري ترانسپورټ او نورو ضروري ښاري شاخصونو د تخنیکي ارزونې له مخې ترتیبېږي.
