د غزني ښار د لومړي پلان په سیمه کې د ښاري تخلفاتو مخنیوی وشو
۱۴۴۷/۹/۲۲
غزني ولایت کې د کور او ښار جوړولو محترم ریاست تخنیکي او مسلکي ټیم له لوري، د غزني ښار د لومړي پلان په سیمه کې د ښاري تخلفاتو مخنیوی وشو.
دغه چاره د کور او ښار جوړولو وزارت، له ښاري تخلفاتو د مخنیوي او د انکشافي پروژو پر تطبیق د څار محترم عمومي ریاست په همغږۍ ترسره شوه.
د ښاري تخلفاتو د رسېدنې ټیم د غزني ولایت د مرکز اړوند د لومړي پلان په ساحه کې د «خواجه علي» مارکېټ څخه لیدنه وکړه.
د یادې څارنې پر مهال څرګنده شوه چې د مارکېټ فلزي پوښ (پیک) د پليلارو پر سر غځول شوی، چې دا کار د ښاري اصولو او منظور شوي پلان خلاف بلل کېږي.
د کور او ښار جوړولو وزارت، د تخنیکي ټیم له لوري د یاد مارکېټ مالک ته لازمې لارښوونې وشوې او ترې وغوښتل شول چې روان کارونه ژر تر ژره ودروي او خپلې چارې د منظور شوي پلان مطابق تنظیم او ترسره کړي.
د ښاري تخلفاتو د رسېدنې ټیم ټینګار وکړ چې د ښار د منظم پرمختګ او د پليلارو د خوندیتوب لپاره به دا ډول څارنې دوام ولري.
د کور او ښار جوړولو وزارت، له ټولو هېوادوالو غواړي، چې ښاري او ودانیز اصول او مقررات مراعت کړي او له خپلسرو کړنو څخه ډډه وکړي.
