د صنایع سبز صنعتي ښارګوټي د شته ستونزو پر حل خبرې وشوې
۱۴۴۶/۰۸/۱۱
د کور او ښار جوړولو وزارت محترم مالي او اداري مرستیال الحاج محمد ارسلاح خروټي، په خپل کاري دفتر کې په صنایع سبز صنعتي ښارګوټي کې د تولیدي فابریکو مالکینو او پانګوالو سره وکتل او پر یو شمېر مهمو موضوعاتو یې خبرې وکړې.
هلته په صنایع سبز صنعتي ښارګوټي کې شته پانګوالو د دغه ښارګوټي د ستونزو د حل په تړاو غوښتنه وکړه چې، د پلان تطبیق، د تګ راتګ لارو اباد ول، برېښنا، زرغونه ساحه، پارک، کلنېک، مسجد او نور مهم ځایونه باید اباد او کار کوونکي ترې ګټه پورته کړي.
د دې ترڅنګ ځینې نورې تخنیکي او حقوقي ستونزې یادې شوې چې، د پانګوالو په وینا حل به یې په تولید او نورو چارو کې اغېزمنه چټکتیا رامنځته کړي.
د کور او ښار جوړولو وزارت محترم مالي او اداري مرستیال الحاج محمد ارسلاح خروټي راغلو پانګوالو ته ډاډ ورکړ چې، د شته ستونزو د حل لپاره به یې کوټلي ګامونه پورته کړي.
ښاغلي محمد ارسلاح خروټي وویل، د کور او ښار جوړولو وزارت د پلانونو له تطبیق څارنه کوي او د پانګوالو ملاتړ کوي چې، دغه برخه کې به اړوندو مسؤلینو ته لارښوونه وکړي، تر څو لاس په کار شي او د صنایع سبز صنعتي ښارګوټي ستونزې حل کړي.
د کور او ښار جوړولو وزارت هڅې کوي چې، د پانګوالو ستونزې حل کړي، داخلي تولیداتو کچه لوړه شي او خلکو ته د کار کولو زمینې برابرې شي.
