د صبریو او یعقوبیو ولسوالۍ د تفصیلي اصلاحي پلان ارزونه وشوه
۱۴۴۷/۰۸/۲۲
د خوست ولایت د صبریو او یعقوبیو ولسوالۍ تفصیلي اصلاحي پلان د کور او ښار جوړولو وزارت د ښاري چارو د محترم مرستیال، شیخ مدار علي کریمي بامیاني، په مشرۍ د اړوندو ریاستونو د ګډې تخنیکي کمېټې له لوري د هر اړخیزو تخنیکي ارزونو، حقوقي څېړنو او اداري ملاحظاتو تر چتر لاندې وارزول شو.
یاد تفصیلي اصلاحي پلان د ولسوالۍ د ښاري پراختیا د منظم مدیریت، د غیرپلاني ابادیو د مخنیوي، د ځمکو د سالم استعمال او د معیاري ښاري چوکاټ د رامنځته کولو په موخه ترتیب شوی دی. د ارزونې پر مهال د پلان محتوا، تخنیکي نقشې او وړاندیز شوې زونبندي په تفصیل سره وڅېړل شوه، چې له مخې یې د صبریو او یعقوبیو ولسوالۍ ساحې د استوګنې، سوداګریزې، عامه تاسیساتو، شنو ساحو، کرنیزو ځمکو او خدماتي زونونو په توګه تنظیم شوې دي.
د ارزونې په بهیر کې د انجنیري معیارونو، ښاري اصولو، حقوقي ملاحظاتو، تخنیکي نقشو او اړوندو قوانینو د تطابق کچه وارزول شوه، څو د اوسېدونکو د استوګنې چاپېریال خوندي، منظم او د راتلونکو اړتیاوو سره سم وي.
د کور او ښار جوړولو وزارت اړوندو ریاستونو ټینګار وکړ، چې د تفصیلي اصلاحي پلان د نهایي کېدو او تطبیق وړاندې به د تخنیکي سپارښتنو، قانوني ملاحظاتو او اداري اصولو بشپړ رعایت ته جدي پاملرنه وشي، تر څو بنسټیز ښاري خدمات پراخ، د ځمکو سرغړونې راکمې او د خلکو د ژوند کیفیت لوړ شي.
د صبریو او یعقوبیو ولسوالۍ د نفوس د زیاتوالي، ښاري پراختیا او د غیرمنظمې ابادۍ د پراخېدو له امله، د تفصیلي اصلاحي پلان اړتیا جدي شوې وه. له همدې امله، د کور او ښار جوړولو وزارت د اړوندو ادارو په همغږۍ دا پلان ترتیب کړ او د تخنیکي ارزونې لپاره یې د ګډې کمېټې له لوري تر بحث او ارزونې لاندې ونیوه، څو د ولسوالۍ راتلونکې پراختیا د ښاري اصولو، قانون او معیاري چوکاټ پر بنسټ تنظیم شي.
