د سمنگان ولایت د مهاجرینو ښارګوټي تفصیلي پلان ترتیب او تطبیق شوی
۱۴۴۷/۰۶/۲۳
د کور او ښار جوړولو وزارت د سروې او جي اي ایس ریاست محترم رئیس وایي چې د دې ریاست اړوند تخنیکي ټیم د سمنگان ولایت مرکز کې د مهاجرینو ښارګوټي تفصیلي پلان په بریالیتوب سره ترتیب او تطبیق کړی دی.
یاد ښارګوټی چې ۲۱۰۰ جریبه ځمکه لري، په ټولیز ډول پکې ۱۴۶۹ استوګنیزې نمرې طرحه شوې دي، دغه تفصیلي پلان د شاوخوا ۱۴۶۹۰ کسانو د استوګنې لپاره ترتیب شوی دی، چې د سیمې د نفوس، خدماتي اړتیاوو، زیربنایي شبکو او د ښاري پراختیا د معیارونو پر بنسټ طرحه شوی دی.
د سروې او جي ای ایس ریاست مسؤلین زیاتوي چې د دغه ښارګوټي تفصیلي پلان جوړول به د بېځایه شویو او مهاجرینو د اساسي ستونزو د حل تر څنګ، په سیمه کې د منظمې ښاري ودې لپاره نوې زمینه برابره کړي.
د کور او ښار جوړولو وزارت د ښارګوټو د منظم پلان جوړونې، سروې، جي ای ایس او تخنیکي طرحو اساسي مسؤلیت لري. د سمنگان د مهاجرینو د ښارګوټي تفصیلي پلان ترتیب د دې وزارت په هغه مهمو پروژو کې شمېرل کېږي چې موخه یې د استوګنې منظم چاپېریال، مناسب خدماتي زیربناوې او د اوږدمهاله ښاري ودې لپاره معیاري بڼه رامنځته کول دي.
دغه پلان به د راتلونکي تطبیق، خدماتي تاسیساتو، سړکونو، عامه ساحو او بنسټیزو اسانتیاوو د ایجاد لپاره اساسي نقشه او تخنیکي لارښود وي.
