د سرپل ښار د ستونزو ارزونه وشوه
۱۴۴۳/۱۰/۳۰
د ښار جوړولو او ځمکو وزارت محترم سرپرست مولوي حمدالله نعماني د سرپل ولایت له محترم مرستیال ملا محمد نادرحقجو او د دغه ولایت د ښار جوړولو او ځمکو محترم رییس محمد نور نوراني سره وکتل.
په دغه لیدنه کې لومړی د سرپل ولایت د شار جوړولو او ځمکو ریاست د فعالیتونو، لاسته راوړنو او ستونزو په اړه خبرې وشوې چې د بېلګې په توګه یې د ښاري پلان د تطبیق لپاره د ځینو ځمکو د استملاک او د ځمکو له غصب د مخنیوي موضوعات یادولی شو.
د سرپل مرستیال والي ښاغلي ملا محمد نادر حقجو د سرپل ولایت په اړه خبرې وکړې چې په تېر کې له پراختیا بې برخې پاتې شوی، ښاري پلانونه په سمه توګه نه دي عملي شوي، سړکونه یې نه دي جوړ شوي او داسې نورې ستونزې لري.
ورپسې د ښار جوړولو او ځمکو وزارت محترم سرپرست مولوي حمدالله نعماني خبرې وکړې چې پر مهال یې د سرپل ولایت په اړه ډاډ ورکړ او هغه لارو چارو ته یې اشاره وکړه چې له امله یې د سرپل ولایت شته ستونزې تر یو بریده حل کېدای شي.
