د سرپل ولایت د الجهاد ولسوالۍ د اداري تعمیر له ودانیزو چارو څارنه ترسره شوه
۱۴۴۷/۱۰/۱۸
د سرپل ولایت د کور او ښار جوړولو ریاست له لوري ټاکل شوي تخنیکي پلاوي، د ولسوالیو د تعمیرونو د جوړولو پروژو د څارنې په لړ کې، د الجهاد ولسوالۍ د اداري تعمیر د ودانیزې پروژې له روان بهیر څخه له نږدې ساحوي څارنه ترسره کړه.
د څارنې په ترڅ کې د پروژې بېلابېلې برخې وکتل شوې او تخنیکي ټیم د کارونو هر اړخیزه ارزونه وکړه. څرګنده شوه، چې د لومړي پوړ د ستنو کانکریټ اچونه بشپړه شوې او د خښتو کار روان دی.
همدارنګه د اطاقونو په تل کې کانکریټ اچونه پرته له سیخ څخه بشپړه شوې او کارونه د منظور شوې نقشې مطابق پر مخ روان وو، چې په دې برخه کې د قراردادي شرکت ته د اوبو ورکولو اړوند لازمې لارښوونې وشوې.
سربېره پر دې، د لومړي منزل د ګادرونو د قالب تړلو او د سلب اړوند کارونه هم جریان درلود، چې تخنیکي ټیم د قالب تړلو په برخه کې لازمې سپارښتنې وړاندې کړې.
د نظارت پر مهال د قراردادي شرکت مسؤلینو ته ټینګار وشو، چې د پروژې ټولې چارې دې د منظور شوې نقشې او انجنیري معیارونو سره سم پر مخ یوسي او د کار کیفیت ته جدي پاملرنه وکړي، تر څو پروژه په معیاري او منظم ډول بشپړه شي.
