د ستونزمنو اسنادو د حل په موخه د تخنیکي کمېټې ناسته وشوه
۱۴۴۳/۰۹/۱۵
د ښار جوړولو او ځمکو وزارت سرپرست محترم مولوي حمد الله نعماني په مشرۍ او د دغه وزارت د مالي او ادارې مرستیال ښاغلي حافظ محمد امین فاروقي او د اړوندو رییسانو او انجنیرانو په ګډون د یاد وزارت د کنفرانسونو په تالار کې د تخنیکي کمېټې ناسته وشوه.
په دغه ناسته کې د ښار جوړولو او ځمکو وزارت اړوندو یو شمېر هغه اپارتمانونو د اسنادو د حقوقي او اداري ستونزو په اړه هر اړخیز بحث وشو چې په تېر حکومت کې وېشل شوي، دوسیې یې بشپړې شوي او قبالې ورکولو ته چمتو شوي دي.
په ناسته کې د یادو اپارتمانونو په اړه فني او مسلکي بحث وشو او د مناسبو حل لارو په پیدا کولو ټینګار وشو.
د یادې تخنیکي کمېټې په ناسته کې د هرې پروژې اړوند مسؤلینو او رییسانو ته لازمې لارښوونې وشوې.
دغه راز د ناستې په دوام کې د هغه (۴۰۰) بابه مسکوني کورونو په اړه هم بحث وشو او نظریات تبادله شول چې لګښت یې د چین جمهوري دولت په بلا عوضه توګه ورکوي.
د ناستې په پایله کې د ښار جوړولو او ځمکو وزارت سرپرست محترم مولوي حمد الله نعماني د یادو پروژو او کورونو اړوندو مسؤلینو او رییسانو ته دندې وسپارلې چې د هرې پروژې د ستونزو او حل لارو په اړه وړاندیزونه ترتیب او وړاندې کړي چې د هرې یوې په اړه به هر اړخیز حقوقي او اداري بحث وشي او له هغې وروسته به لازم اقدامات وشي.
