د حضوري چمن د ملکیت د انتقال د ارزونې هیئت ناسته وشوه
۱۴۴۳/۰۹/۰۴
دغه ناسته د ښار جوړولو او ځمکو وزارت د سرپرست محترم مولوي حمد الله نعماني په مشرۍ او د مالیې محترم وزارت، اطلاعات او فرهنګ محترم وزارت، د کابل محترمې ښاروالۍ ، د ملي پراختیا عملیاتي او ملاتړي محترمې ادارې او د تربیت بدني محترم ریاست د مسؤلینو په ګډون په ښار جوړولو او ځمکو وزارت کې ترسره شوه.
په یاده ناسته کې بحث وشو چې څنګه کېدای شي د حضوري چمن ملکیت د ملي پراختیا عملیاتي او ملاتړې ادارې څخه د تربیت بدني ریاست ته انتقال شي.
د ښاغلي مولوي حمد الله نعماني په مشرۍ دغه هیئت یادونه وکړه چې حضوري چمن د هېواد له تاریخي ځایونو څخه دی چې باید ساتنه او پالنه یې وشي او په لا وده کې یې فعال رول ولوبول شي.
مولوي حمد الله نعماني وویل، حضوري چمن د تاریخي مخینې له پلوه د هېواد په کچه یو با ارزښته او مهم ځای دی چې په وینا یې که سم مدیریت شي او پالنه یې وشي د یوې ښې ګټورې او عایداتي سرچینې په توګه ترې کار اخیستل کېدای شي.
د ښار جوړولو او ځمکو وزارت سرپرست د حضوري چمن د ملکیت د انتقال په اړه زیاته کړه: ښه به دا وي چې یاد تاریخي ځای د تېر په څېر د ملي پراختیا عملیاتي او ملاتړې ادارې په واک کې پاتې شي او د ګټې اخیستنې لپاره دې یوه جامع طرحه جوړه شي چې هم خپل تاریخي حیثیت وساتي او هم په یوې عایداتي سرچینې بدل شي.
د اوس لپاره پرېکړه پر دې وشوه چې یاد هیئت به د حضوري چمن په اړه یوه طرحه جوړه کړي چې د ټولو له هوکړې وروسته به د پلې کېدا وړ وګرځي.
