د جوزجان په آقچه ولسوالۍ کې د ښاروالۍ د ګودام له چارو تخنیکي څارنه وشوه
۱۴۴۷/۰۱/۱۴
جوزجان ولایت کې د کور او ښار جوړولو ریاست محترم رئیس الحاج ملا عبدالله فیضان وایي، د تخنیکي ټیم او موظف هیئت په ملتیا یې د اقچه ولسوالۍ د ښاروالۍ اړوند د ګودام له ودانیزو چارو لیدنه او څارنه وکړه.
ښاغلی مولوي فیضان وایي، دغه څارنه د انجنیري چارو د ارزونې، کیفیت سنجولو او د تطبیق د میکانېزم د څېړنې په موخه ترسره شو، چې د لیدنې په مهال، د ګودام د پلستر کارونه، د ساختماني موادو کیفیت، د کار ساحه او پرمختګ تر جدي څار لاندې ونیول شول.
نوموړی وایي، د ساختماني شرکت مسؤلینو ته یې لازمې لارښوونې وکړې، څو د پروژې ټول تخنیکي او ساختماني کارونه د تصویب شوې نقشې، د براورد شویو حجمونو، تدارکاتي شرطنامې او د انجنیري معیارونو مطابق پرمخ یوسي.
همداراز، د کار د لا ښه والي، اغېزمنتوب او دوامداره کیفیت لپاره یو لړ مسلکي نظریات او وړاندیزونه هم وړاندې شول.
د هغه په خبره، یاده پروژه تر اوسه ۸۰ سلنه بشپړ شوې او که د همدې کیفیت په رڼا کې کار دوام ومومي، نو ژر تر ژره به بشپړه شي.
د کور او ښار جوړولو وزارت، د پروژو پر وخت او د معیار مطابق تطبیق ته ژمن دی، او دا ډول څارنیزې لیدنې به دوام ولري تر څو د عامه شتمنیو د مؤثر مدیریت، شفافیت، او خلکو ته د باکیفیته خدماتو رسول ډاډمن شي.
