د بغلان ولایت د ده صلاح ولسوالۍ ستراتیژیک پلان منظور شو
ښار جوړولو او ځمکو وزارت سرپرست وزیر محترم محمود کرزی د بغلان له والي محترم ستر جنرال تاج محمد جاهد، په ملي شورا کې د خلکو له استازو، ولایتي شورا رئیس او د وزارت یو شمېر رئیسانو سره په کتنه کې د بغلان ولایت د ده صلاح ولسوالۍ ستراتیژیک پلان منظور کړ.
په دې کتنه کې، د بغلان والي او په ملي شورا کې د خلکو استازو د ښار جوړولو او ځمکو وزارت له هر اړخیزه همکارۍ په مننې وویل چې یاد وزارت د هېواد په کچه د ښاري انکشاف او ټولګټو پروژو د تطبیق په برخه کې مهم او رغنده رول لري او د دې پلان په پلي کېدو سره به د ده صلاح ولسوالۍ منظم انکشاف او پراختیایي پروژو د تطبیق لپاره اړین فرصتونه برابر شي.
ورپسې، ښار جوړولو او ځمکو وزارت سرپرست وزیر محترم محمود کرزی بغلان یې د یاد وزارت لپاره یو له مهمو ولایتونو څخه وباله او ټینګار یې وکړ چې د ښار جوړولو او ځمکو وزارت د ستراتیژیک او تفصیلي پلانونو په منظورۍ سره د ښارونو د انکشاف د مسیر د تعیینېدو سربېره، ټولګټو پروژه تطبیق ته چې پایله یې اقتصادي وده، کارمونده او ټولنیز هوساینه ده لاره هواروي. ښار جوړولو او ځمکو وزارت سرپرست وزیر همدارنګه اړونده مسوولینو ته لارښوونه وکړه ترڅو د یاد پلان په تطبیق کې له تطبیق کوونکو ادارو سره همکاري وکړي.
د ویلو ده چې پدې وروستیو کې د بغلان ولایت د دوشي او اندراب ولسوالیو ستراتیژیک پلانونه د ښار جوړولو او ځمکو وزارت مشرتابه له لوري منظور شوي دي.
په تېر یو میاشت کې، ښار جوړولو او ځمکو وزارت مشرتابه ۲۲ انکشافي پلانونه (پنځه تفصیلي پلانونه، لس ستراتیژیک پلانونه، دوه منطقوي پلانونه او پنځه د بهسازۍ پلانونه) منظوري کړي چې په تطبیق سره به یې نږدې ۱۵ زره کسانو د مېشتېدو زمینه برابره شي، د ښارونو د منظم انکشاف سربېره، ټولګټو پروژو تطبیق ته لاره هواره او غیر رسمي ښاري سیمې په ښو استوګنیزې سیمې بدلې شي.
###
