د امربالمعروف وزارت اړوند مسجد شریف د څارنې تر بشپړ پړاو وروسته تیار شو
۱۴۴۷/۰۶/۲۰
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، د بنسټیزو پروژو د نظارت او تطبیق ریاست تخنیکي ټیم د امربالمعروف و نهی عن المنکر د شکایاتو اورېدلو وزارت اړوند مسجد شریف پروژې څخه منظم او دوامدار نظارت ترسره کړی دی.
د بنسټیژو پروژو د نظارت او تطبیق ریاست محترم رئیس وایي، د ترسره شویو څارنو پایلې ښيي چې د پروژې ټول تخنیکي کارونه د منظور شوو احجامو مطابق په بشپړ ډول عملي شوي دي، او پروژه ۱۰۰ سلنه بشپړه شوې ده.
د نوموړي په خبره، اوس مهال د پروژې ځینې وروستۍ ارزونې د یاد وزارت له لوري روانې دي، چې د بنسټیزو پروژو د نظارت او تطبیق ریاست تخنیکي ټیم یې په ګډه ارزونه کې همکاري کوي.
دا پروژه د ښار جوړونې د معیارونو، تخنیکي اصولو او کیفیتي شرایطو په پام کې نیولو سره ترسره شوې ده، چې له بشپړېدو سره به یې محلي وګړي د دیني او ټولنیزو فعالیتونو لپاره له یو معیاري او مجهز مسجد څخه برخمن شي.
د مسجد شریف پروژه د امربالمعروف و نهی عن المنکر د شکایاتو اورېدلو وزارت په غوښتنه پیل شوې وه، چې د کور او ښار جوړولو وزارت د بنسټیزو پروژو د نظارت او تطبیق ریاست د تخنیکي ټیم تر نږدې څارنې لاندې پرمخ تللې ده.
