د ارزګان په مرکز ترینکوټ کې د راستانه شوو مهاجرینو د ښارګوټي اړوند د سړکونو د جوړولو چارې پیل شوې
۱۴۴۷/۶/۲۶
د اسکان دایمي کمېټې په مشرۍ د کور او ښار جوړولو وزارت هڅې پیل کړي، چې د راستنېدونکو اړمنو مهاجرو لپاره په ښارګوټو کې د ټولګټو چارو ابادي او رغونه پیل کړي.
په همدې لړ کې دا ځل د ارزګان ولایت په مرکز ترینکوټ کې د راستنېدونکو اړمنو مهاجرو کورنیو لپاره د ښارګوټي اړوند د سړکونو د جوړولو چارې پیل شوې.
ارزګان ولایت کې د کور او ښار جوړولو ریاست وایي، په یاد ښارګوټي کې د سړکونو د جوړولو د چارې د دغه ولایت د محترم والي په شتون کې پیل شوې.
دمګړۍ د یاد ښارګوټي اړوند د سړکونو جوړولو لپاره پڼځه میلیونه افغانۍ ځانګړي شوې دي، چې د اړتیا سره سم به نورې هم ورته ځانګړې شي.
یاد سړکونه به هوارکاري شي، جغل به پرې واچول شي او د تګ راتګ لپاره به مناسب ورګرځول شي.
تمه ده چې په دې او دېته ورته نورو ټولګټو چارو په ابادولو سره به د یاد ښارګوټي د ابادۍ چارې چټکې، اغېزمنې او ګټورې تمامې شي.
د کور او ښار جوړولو وزارت هڅه کوي چې په ټول هېواد کې د مهاجرینو اړوند ښارګوټو چارې ګړندۍ کړي، ترڅو درنو مهاجرو کورنیو ته د دایمي استوګنې زمینه برابره شي.
