بدخشان کې د درې ټولګټو پروژو رغنیزې چارې دوام لري
ښارجوړولو او ځمکو وزارت د بدخشان په مرکز فیض آباد په شپږمه ناحیه کې د دې ولایت د پوهنتون کتابتون ودانۍ، د دې ولایت د یفتل ولسوالۍ په قریه باغ بالین کلي کې د یو شپږ صنفي ښوونځي او همداراز د ارګو ولسوالۍ د چتراق ۱۰ صنفي ښوونځي رغنیزې چارې تر کار لاندې لري.
د بدخشان پوهنتون د کتابتون ودانۍ په ۶۴۵ متر مربع ځمکه په درې پوړونو د ۳۶ میلیونه افغانیو په ارزښت جوړیږي چې رغنیزې چارې یې ۶۱ سلنه بشپړې شوې دي. همداراز د قریه باغ بالین کلي شپږ صنفي ښوونځی په ۶۴۵ متر مربع ځمکه کې په دوه پوړونو د ۲۴ میلیونه افغانیو په ارزښت او چتراق ۱۰ صنفي ښوونځی په ۱۰۶۰ متر مربع ځمکه کې د ۲۵ میلیونه افغانیو په ارزښت د ښارجوړولو او ځمکو وزارت له پراختیايي بودیجې جوړیږي چې رغنیزې چارې یې ۹۵ سلنه بشپړې شوې دي.
د ټولګټو پروژې تطبیق د ښارجوړولو او ځمکو وزارت لومړیتوب دی او یاد وزارت د حکومت پراختیايي او اقتصادي پلانګذارۍ او د پالیسیو د تطبیق په برخه کې جدي او عملي اقدامات ترلاس لاندې نیولي دي.
###
