د کابل ښار په ۱۲مه ناحیه کې د شنې ساحې د غیرقانوني ودانیو څارنه وشوه
۱۴۴۸/۴/۹
د کور او ښار جوړولو وزارت د کنترول، کیفیت او د ښاري سرغړونو د مخنیوي عمومي ریاست اړوند د ښاري سرغړونو د مخنیوي ریاست تخنیکي ټیم، د عامه پوهاوي له آمریت سره په همغږۍ د کابل ښار د ۱۲مې ناحیې اړوند له دویم بلاک څخه د ماموریت څلورلارې په امتداد د شنې ساحې«شرید سبز» څارنه او ارزونه ترسره کړه.
د څارنې پر مهال څرګنده شوه چې د یادې ساحې په یوه برخه کې یو شمېر هټۍ او ودانیزې چارې په داسې حال کې روانې دي چې د اړوند تفصیلي پلان له مخې دغه ساحه د شنې ساحې په توګه تثبیت شوې ده.
د ښاري سرغړونو د مخنیوي ریاست له لوري اړوندو کسانو ته لارښوونه وشوه چې د خپلو ساختماني چارو اړوند اسناد، مدارک او رسمي جوازونه د درېیو کاري ورځو په موده کې له یاد ریاست سره شریک کړي، څو اسناد یې له منظور شوو ښاري پلانونو سره په دقیق ډول وکتل شي او د سرغړونې د تثبیت په صورت کې، د نافذه قوانینو له مخې لازم اقدامات ترسره شي.
د کنترول، کیفیت او د ښاري سرغړونو د مخنیوي عمومي ریاست په هدایت، د کابل ښار په ټولو ناحیو کې د ښاري سرغړونو د مخنیوي او د منظور شوو پلانونو د تطبیق د څارنې لړۍ په دوامداره او هدفمند ډول روانه ده او د هر ډول سرغړونې پر وړاندې به د نافذه قوانینو له مخې لازم اقدامات ترسره کېږي.
