د کابل–بګرام ستراتېژيک سړک د جوړولو چارې په څو برخو کې په چټکۍ روانې دي
۱۴۴۸/۱/۲۸
د کور او ښار جوړولو وزارت، د نوي کابل ښار د پراختیا محترم عمومي ریاست اړوند تخنیکي او مسلکي ټیم، د کابل–بګرام ستراتیژیک سړک د جوړولو او بنسټیزو چارو له روان بهیر څارنه وکړه، چې په خبره یې کارونه په بېلابېلو برخو کې دوام لري او اوسمهال د سړک د بستر جوړولو، د بنسټیزو طبقو هوارولو او ټینګولو، د پلچکونو جوړولو او یو شمېر نورو اړوندو چارو عملي کارونه روان دي.
د پروژې د ورځني کاري راپور له مخې، د ګلدین سیټي ودانیز شرکت سیمې په مربوطاتو کې د سړک د لومړۍ بنسټیزې طبقې لپاره د موادو اچولو، هوارولو او ټینګولو چارې ترسره شوې دي.
همدارنګه د عمرزیو او بختیارانو په ساحو کې د سړک د بنسټیزې طبقې د موادو اچولو، هوارولو او ټینګولو کارونه هم دوام لري.
د سړک په ختیځ لوري کې د فیصل محمدي د تېلو ټانک او بابه قشقار سړک ته څېرمه د ځمکې د کیندنې چارې روانې دي، په داسې حال کې چې د بازار په سویلي برخه کې د سړک د بستر د هوارولو او ټینګولو کارونه هم ترسره کېږي.
په ورته وخت کې، د ذغالپلورونکو سیمې ته څېرمه د سړک د دویمې بنسټیزې طبقې د هوارولو او ټینګولو کارونه روان دي او د پروژې په مسیر کې د سړک دواړو غاړو ته د استملاک شویو ودانیو د تخریب چارې هم په مناسب سرعت دوام لري.
د کابل–بګرام ستراتیژیک سړک د جوړولو پروژه، د نوي کابل ښار له مهمو زیربنايي پروژو څخه ده، چې د بشپړېدو په صورت کې به د ترافیکي اسانتیاوو د رامنځته کولو او د کابل او شمالي سیمو ترمنځ د تګ راتګ په ښهوالي کې مهم رول ولوبوي.
