د کابل ښار د میرویس ښارګوټي له وضعیت څخه تخنیکي څارنه ترسره شوه
۱۴۴۸/۱/۲۷
د کور او ښار جوړولو وزارت د کیفیت کنټرول او د ښاري سرغړونو د مخنیوي لوی ریاست اړوند، د ښاري سرغړونو د مخنیوي ریاست تخنیکي ټیم د دوامدارو ساحوي څارنو په لړ کې د کابل ښار د اتمې ناحیې اړوند د میرویس ښارګوټي له وضعیت څخه لومړنۍ تخنیکي څارنه ترسره کړه.
د څارنې پر مهال د ښارګوټي د عمومي پلان، استوګنیزو او سوداګریزو برخو، عامه تاسیساتو، د سړکونو شبکې، کانالیزاسیون، برېښنا او نورو بنسټیزو زیربناوو وضعیت په تخنیکي ډول وارزول شو.
همدارنګه، د ښارګوټي له مسئولینو سره تر لیدنې وروسته، د پلي شویو پلانونو، تخنیکي نقشو، د ملکیت اسنادو او نورو اړینو مدارکو د وړاندې کولو غوښتنه وشوه، څو له هر اړخیزې تخنیکي ارزونې وروسته د ښارګوټي د وضعیت په اړه بشپړ راپور د لازم تصمیم نیولو لپاره چمتو شي.
د دغې څارنې موخه د ښاري پلانونو د دقیق تطبیق ارزونه، د ودانیزو معیارونو رعایت، د ښارګوټو د تفصیلي پلانونو ساتنه، د غیرمعیاري پراختیاوو مخنیوی او د ښاري مدیریت پیاوړتیا ده.
د معیاري ښار جوړولو، د ښاري پلانونو د خوندي تطبیق او د ښاري نظم د پیاوړتیا په موخه، تخنیکي او ساحوي څارنې په دوامداره توګه ترسره کېږي، څو د ودانیزو چارو بهیر د نافذه قوانینو او تخنیکي معیارونو سره سم پر مخ ولاړ شي.
