د کابل – بګرام ستراتیژیک سړک د لومړي پړاو چارې په چټکۍ روانې دي
۱۴۴۸/۱/۲۵
د کور او ښار جوړولو وزارت د نوي کابل ښار د پراختیا محترم عمومي ریاست تر چتر لاندې، د کابل – بګرام ستراتیژیک سړک د لومړي پړاو د ۲.۶ کیلومتره برخې د هوارولو او بنسټیزو چارو عملي کارونه په چټکۍ روان دي، چې تر دې دمه یې ۳۱ سلنه فزیکي پرمختګ کړی دی.
د نوي کابل ښار د پراختیا محترم عمومي ریاست وایي، د پروژې د تطبیقي مهالوېش له مخې، پاتې چارې به د قرارداد او منظور شوي تخنیکي پلان مطابق د ۱۴۰۶ کال د زمري میاشتې تر ۱۵مې بشپړې شي.
د کابل – بګرام ستراتیژیک سړک، د نوي کابل ښار د ماسټر پلان له مهمو او بنسټیزو زېربنايي پروژو څخه شمېرل کېږي، چې ټول اوږدوالی یې شاوخوا ۴۳ کیلومتره او پلنوالی یې ۱۵۰ متره دی.
د روان کال لپاره یې د ۲.۶ کیلومتره برخې چارې د ۵۰ مترو په پلنوالي په قرارداد ورکړل شوي چې عملاً پرې کار روان دی.
د منظور شوي ډیزاین له مخې، په دې سړک کې د برېښنايي بسونو، کوچنیو او لویو موټرو او ښاري بسونو لپاره ځانګړي لینونه، سرویس سړکونه، پلي لارې، شنې ساحې، ویالې، ګلدانونه او د سړک غاړې په معیاري ډول په پام کې نیول شوې دي.
د دې پړاو د جوړولو ټولیز قراردادي لګښت ۴۵۵ میلیونه، ۸۵۳ زره او ۳۷۰ افغانۍ دی.
ټاکل شوې ده، چې د دې ستراتیژیکې پروژې په بشپړېدو سره به د کابل ښار شمالي کمربند له شمالي ولایتونو سره په معیاري ډول ونښلول شي، د ترانسپورټي تګ راتګ ظرفیت به لوړ، اقتصادي او سوداګریز فعالیتونه به پراخ، د پانګونې فرصتونه به زیات او د نوي کابل ښار د منظمې، انډولیزې او دوامدارې ښاري پراختیا لپاره به پیاوړی بنسټ برابر شي.
