د کابل ښار د اوولسمې ناحیې اړوند سیمو کې د غیرپلاني ودانیزو فعالیتونو مخنیوی وشو
۱۴۴۷/۱۲/۱
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست تخنیکي ټیمونو، د دوامدارو نظارتي پروګرامونو په لړ کې د کابل ښار د اوولسمې ناحیې اړوند د کوتل سړک له مسیر څخه تر وروستیو ساحو پورې، د ادروګل او طلایي ښارګوټو په ګډون، ساحوي تخنیکي څارنه ترسره کړه.
یاده څارنه د ښاري سرغړونو د رسېدنې او اطلاع رسونې اړوندو امریتونو د تخنیکي ټیمونو له لوري ترسره شوه، چې موخه یې د هغو دوکانونو، ورکشاپونو، رستورانتونو او ساختماني فعالیتونو ارزونه او تنظیم و، چې د تفصیلي پلان خلاف او په غیر اصولي ډول جوړ شوي وو.
د ارزونې پر مهال هغه موارد وڅېړل شول چې پکې د ښاري اصولو، منظور شوو پلانونو او نافذه مقرراتو د نقض نښې موجودې وې.
تر دې وړاندې د یادو ساحو مالکینو او کسبه کارانو ته رسمي مهلت ورکړل شوی و، څو خپلې غیرمجازې ودانۍ او فعالیتونه د قانوني او تخنیکي معیارونو مطابق اصلاح کړي.
د څارنې په پایله کې یو شمېر مالکینو خپلې چارې درولې او د اصلاحاتو بهیر یې پیل کړی و، خو هغه موارد چې له ټاکل شوي مهلت وروسته هم د اصولو خلاف پاتې وو، د تخنیکي ټیمونو له لوري مهر او لاک شول او اړوندو اشخاصو ته لازمې سپارښتنې وشوې، ترڅو خپلې چارې د تفصیلي پلان مطابق تنظیم کړي.
د دغو نظارتونو اساسي موخه د ښاري پلانونو سم تطبیق، د غیرمعیاري او خودسرانه ودانیزو فعالیتونو مخنیوی، د ښاري نظم تأمین، د بې نظمې ګڼې ګوڼې راکمولو او د ښاري مدیریت پیاوړتیا بلل کېږي.
