په بامیان ولایت کې راستنېدونکو مهاجرینو ته د استوګنیزو نمرو د وېش دوهم پړاو پیل شو
۱۴۴۷/۱۱/۲۷
د بامیان ولایت مقام او د مېشتېدنې او ځمکو وېش کمېټې له لوري، د راستنېدونکو مهاجرو لپاره د استوګنیزو نمرو د وېش دوهم پړاو په رسمي ډول پیل شو.
دغه بهیر د بامیان ولایت مقام، د اړوندو امارتي ادارو مسؤلینو او د کور او ښار جوړولو ریاست د استازو په حضور کې د بامیان مرکز اړوند د اژدر درې په سیمه کې پیل شو، چې له مخې یې له ایران او پاکستانه راستنو شوو لسګونو کورنیو ته د استوګنیزو نمرو د وېش لړۍ عملي شوه.
د مهاجرینو په ښارګوټي کې د جومات، ښوونځي او روغتیايي مرکزونو، تفریحي پارکونو او نورو بنسټیزو اسانتیاوو جوړول هم په پام کې نیول شوي، څو د اوسېدونکو لپاره مناسب او معیاري چاپېریال رامنځته شي.
د بامیان ولایت په بېلابېلو سیمو کې د زرګونو راستنېدونکو کورنیو لپاره د استوګنیزو ځمکو د وېش او دایمي اسکان پروګرامونه په همغږۍ او منظم ډول روان دي.
د کور او ښار جوړولو وزارت او اړوندې کمېټې په وروستیو میاشتو کې په بېلابېلو ولایتونو کې راستنېدونکو مهاجرینو ته د استوګنیزو ښارګوټو جوړولو، د ځمکو د وېش او د بنسټیزو خدماتو د برابرولو لړۍ چټکه کړې، څو د بېرته راستنېدونکو کورنیو د دایمي میشتیدنې ستونزې حل او د منظم ښاري چاپېریال زمینه برابره شي.
