د الشفاء روغتون د بیا رغونې پروژې له روانو چارو تخنیکي څارنه ترسره شوه
۱۴۴۷/۱۱/۲۷
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ساختماني او زیربنایي پروژو د تطبیق د څار ریاست تخنیکي ټیم، د کابل ښار اړوند د الشفاء روغتون د بیا رغونې پروژې له روانو چارو څخه ساحوي تخنیکي څارنه ترسره کړه.
د څارنې پر مهال د پروژې په لومړۍ برخه کې د داخلي دېوالونو د ډکولو او رنګمالۍ، د مرکزي ګرمۍ د پایپونو غځولو، د اوبو رسولو او کانالیزاسیون، د طبي پردو ګنډلو او د زینو د سنګکارۍ چارې روانې وې.
همداراز، په دویمه برخه کې د داخلي دېوالونو د پلسترکارۍ، خښتوکارۍ، کاشيکارۍ، د برېښنا د مزو غځولو او د اکسیجن پلانت د پایپونو د نصب چارې جریان درلود.
په درېیمه برخه کې د اکسیجن پلانت د مسي پایپونو نصب، د نرس سټېشن اړوند چارې او د اوبو رسولو او کانالیزاسیون فعالیتونه روان وو.
د معلوماتو له مخې، یاده پروژه د عامې روغتیا وزارت له مهمو پروژو څخه ده، چې ساختماني چارې یې د ملي پراختیا شرکت له لوري د قرارداد له مخې پر مخ وړل کېږي.
د تخنیکي څارنې پر مهال قراردادي شرکت ته لازمې سپارښتنې او تخنیکي لارښوونې وشوې، څو ټولې چارې د تخنیکي اسنادو، ملي او نړیوالو معیارونو او د کاري مصؤنیت اصولو مطابق ترسره شي.
د روغتیايي بنسټونو بیارغونه او معیاري کول د عامه خدمتونو د ښه والي او د ناروغانو لپاره د معیاري روغتیايي اسانتیاوو د برابرولو په برخه کې مهم رول لري، چې تخنیکي څارنه یې د کیفیت د تضمین اساسي برخه ګڼل کېږي.
