په ارزګان کې د ښاري سرغړونو د مخنیوي په موخه څارنه تر سره شوه
۱۴۴۷/۱۱/۱۶
د ارزګان ولایت د کور او ښار جوړولو ریاست اړوند تخنیکي ټيم، د دې ولایت د څلورمې ناحیې په مربوطاتو کې د ښاري سرغړونو د مخنیوي په موخه نظارتي څارنه ترسره کړه.
د څارنې پر مهال څرګنده شوه چې یو شمېر کسانو غوښتل په استوګنیزو نمره کې سوداګریزې هټۍ جوړې کړي، حال دا چې مخکې یې اړوندو ادارو ته د استوګنیزو خونو د جوړولو ژمنه کړې وه.
د یادو ساختماني چارو په ارزونه کې ولیدل شول چې جوړېدونکې خونې د عمومي سړک پر لور پرانیستل شوې دي، چې دا کار د نافذه ښاري مقرراتو خلاف بلل کېږي. له همدې امله، سرغړونکو ته د ساختماني فعالیتونو د سمدستي درولو لارښوونه وشوه.
د ښاري سرغړونو مخنیوی د کور او ښار جوړولو وزارت له اساسي دندو څخه دی، چې موخه یې د ښارونو منظم پراختیا، د ښاري اصولو تطبیق او د عامه ګټو خوندیتوب دی.
