د کابل ښار په پنځمه ناحیه کې د ناقانونه ودانیزو فعالیتونو مخه ونیول شوه
۱۴۴۷/۱۱/۱۲
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست، د رسیدګۍ، عامه پوهاوي او نظارت ټیمونو، د دوامداره څارنو په لړ کې، د کابل ښار پنځمې ناحیې اړوند د سره میاشت ښارګوټي څخه څارنه تر سره کړه.
د یاد ریاست نظارتي ټیمونو تر دې وړاندې هم څو ځلې له یادې ساحې لیدنه کړې وه او د پروژو مالکینو ته یې لارښوونه کړې وه، څو د ښاري اصولو او نافذه مقرراتو خلاف ودانیز فعالیتونه ودروي، تر څو په دې اړه د وزارت د مقام وروستۍ پرېکړه وشي.
خو د وروستیو ارزونو پر مهال څرګنده شوه، چې یو شمېر ودانیز فعالیتونه لا هم په پټه توګه دوام لري. له همدې امله، د تخنیکي ټیم له لوري د یادو غیرقانوني فعالیتونو مخه ونیول شوه او د نورو سرغړونو د دوام د مخنیوي لپاره لازم اقدامات ترسره شول.
د دې څارنې اساسي موخه د منظور شوو ښاري پلانونو د سم تطبیق تأمین، د غیرمجازو ودانیزو فعالیتونو مخنیوی او د ښار په کچه د غیرمعیاري جوړښتونو د پراختیا کنټرول بلل کېږي.
د یادولو وړه ده، چې د دا ډول څارنو بهیر به په دوامداره توګه روان وي او هېچا ته به اجازه ور نه کړل شي، څو د نافذه قوانینو او ښاري اصولو خلاف ودانیز فعالیتونه ترسره کړي.
