د سرطاني ناروغانو د طبي کمپلکس د تخنیکي کمېټې غونډه ترسره شوه
۱۴۴۷/۱۱/۰۹
د سرطاني ناروغانو لپاره د طبي کمپلکس د جوړېدو په تړاو د تخنیکي کمېټې غونډه د کور او ښار جوړولو وزارت د مسکن، ودانیزو چارو او د برنامو د پرختیا په معینیت کې ترسره شوه.
یاده غونډه د کور او ښار جوړولو وزارت د انجنیرۍ نظام او د مقرراتو د طرحې محترم رئیس په مشرۍ جوړه شوې وه، چې پکې د تخنیکي کمېټې یو شمېر غړو او د عطا خیریه بنسټ مسؤلینو ګډون درلود.
په غونډه کې د یاد کمپلکس د (کانسپت)، (ټي او ار) او نقشو د طرحې په اړه بحث او د نظرونو تبادله ترسره شوه.
همدارنګه، د عطا خیریه بنسټ مسؤلینو د پروژې د يراختیايي پلان، د بسترونو د ظرفیت، د نقشې د ډیزاین او د ډیزاین کوونکي شرکت په اړه د ګډونوالو پوښتنو ته وضاحت ورکړ.
په پای کې پرېکړه وشوه چې د عطا خیریه بنسټ دې د پروژې اړوند ټول موضوعات په لیکلي بڼه د تخنیکي کمېټې له لارې د چارو ادارې عمومي ریاست سره شریک کړي، څو د پروژې د تطبیق په اړه موجودې پوښتنې حل شي.
د یادونې وړ ده چې یاد طبي کمپلکس به د کابل نوي ښار په محدوده کې په ۱۱ جریبه ځمکه کې جوړ شي، چې د احاطې چارې یې بشپړې شوې دي.
د کور او ښار جوړولو وزارت مسلکي او تخنیکي ټیمونه په پرله پسې هڅو بوخت دي، څو معیاري، عصري او باکیفیته ډیزاینونه ترتیب کړي او د هېوادوالو لپاره لازمې اسانتیاوې رامنځته کړي.
