د کابل ښار په دوهمه ناحیه کې د کانالیزاسیون د رغنیزو چارو تخنیکي څارنه ترسره شوه
۱۴۴۷/۱۰/۲۱
د کور او ښار جوړولو وزارت د ساختماني او زیربنایي چارو د تطبیق د څار ریاست اړوند تخنیکي ټیم له لوري، د دوامدارو تخنیکي څارنو په لړ کې د کابل ښار په دوهمه ناحیه کې د محمدجان خان سړک پر غاړه د مخابراتو او معلوماتي ټکنالوژۍ وزارت د ۱۸ پوړیزې ودانۍ د کانالیزاسیون د رغنیزو چارو له پروژې څخه تخنیکي څارنه ترسره شوه.
یاده څارنه د اسلامي امارت د کابینې د مصوبو او د وزارت د مقام د هدایت پر بنسټ ترسره شوې، چې په ترڅ کې یې په ساحه کې روان تخنیکي فعالیتونه له نږدې وکتل شول.
د څارنې پر مهال د تشنابونو په کف کې د سیخ پرته کانکریټ اچول، د دیوالونو او کف لپاره د ایزوګام نصبول او د فاضله اوبو پایپونو ړ نښلولو چارې روانې وې چې ترې څارنه وشوه.
یاده پروژه د مخابراتو او معلوماتي ټکنالوژۍ وزارت له لوري تمویلېږي، چې په ۱۴۰۴ کال کې یې قرارداد شوی او دا مهال شاوخوا ۵۵ سلنه فزیکي پرمختګ لري.
د څارنې په ترڅ کې د تطبیقوونکي شرکت مسؤلینو ته لازمې لارښوونې وشوې، څو چارې د قرارداد له تخنیکي اسنادو، ملي او نړیوالو معیارونو او د کار د خوندیتوب اصولو سره سم پرمخ یوسي.
د رغنیزو پروژو دوامداره تخنیکي څارنه د کار د کیفیت د لوړولو، د معیارونو د رعایت او د عامه تاسیساتو د دوامدارې ګټې اخیستنې لپاره مهمه بلل کېږي.
