په کونړ کې د دمکلي او چنار ډبي سیمو د ښاري پلان جوړونې لپاره تخنیکي سروې ترسره شوه
۱۴۴۷/۰۹/۰۹
د غیر پلاني ساحو د رغونې ریاست یو تخنیکي پلاوی د کونړ ولایت مرکز اسعداباد ښار ته سفر وکړ او د ښار په لومړۍ او درېیمې ناحیې کې یې د دمکلي او چنار ډبي سیمو لپاره د ښاري بهسازي پلان د جوړولو په موخه تخنیکي سروې ترسره کړه.
د ورکړل شوو معلوماتو له مخې، یادې سیمې د ستراتیژیک پلان له مخې غیر پلاني ښودل شوې دي، چې له همدې امله به په کې توپوګرافي، اقتصادي او ټولنیزې سروې په منظم ډول ترسره شي. د دغو سروې ګانو له لارې به د سیمو واقعي وضعیت، د نفوس اړتیاوې او د پراختیا امکانات تثبیت شي.
ټاکل شوې ده چې د سروې له بشپړېدو وروسته، ټول تخنیکي معلومات او راټوله شوې ډیټا مرکز کابل ته ولېږدول شي، تر څو پر بنسټ یې د یادو سیمو لپاره معیاري او منظم ښاري پلان ډیزاین شي. دغه پلان به وروسته د تطبیق په موخه د کونړ ولایت اړوند ښاروالۍ ته وسپارل شي.
مسؤولینو ویلي، د دې اقدام موخه د غیر پلاني ساحو تدریجي منظمول، د ښاري ستونزو کمول او د سیمې اوسېدونکو ته د بنسټیزو ښاري اسانتیاوو برابرول دي.
