د میدان وردګ ولایت د اصلاحات اداري ښارګوټي د بنسټیزو شبکو پلانونه منظور شول
۱۴۴۷/۰۸/۰۱
د کور او ښار جوړولو وزارت د ښاري زېربناوو د طرحې ریاست له لوري، د کاري پلان پر بنسټ، د میدان وردګو ولایت د اصلاحات اداري ښارګوټي لپاره د بنسټیزو شبکو جامع پلانونه ترتیب او ډیزاین شوي دي. دغه پلانونه د کور او ښار جوړولو وزارت محترم وزیر الحاج نجیبالله حیات حقاني له لوري منظور او لاسلیک شوي دي.
په منظورشوو پلانونو کې د اصلاحات اداري ښارګوټي د اصلاح شوي سړک سازۍ پلان، د فاضلابو د شبکې پلان، د شنو ساحو د اوبولګولو پلان او د فاضلابو د تصفیېخونې پلان شامل دي. دا پلانونه د نړیوالو معیارونو او تخنیکي کوډونو مطابق ډیزاین شوي او د ښارګوټي د منظم ښاري پراختیا، د ښاري خدماتو د کیفیت لوړولو او د چاپېریال د خوندیتوب په موخه ترتیب شوي دي.
ټولې چارې د ښاري زېربناوو د طرحې ریاست له لوري په مسلکي توګه ترتیب شوي، او د تطبیق په صورت کې به د سیمې اوسېدونکو ته د معیاري ښاري ژوند زمینه برابره کړي.
د کور او ښار جوړولو وزارت د هېواد په کچه د ښاري پراختیا د معیارونو د لوړولو، د بنسټیزو خدماتو د پیاوړتیا او د ښاري چاپېریال د تنظیم په موخه د ښاري زېربناوو د پلان جوړولو چارې په دوامداره توګه پر مخ وړي. د اصلاحات اداري ښارګوټي پلانونه د همدې ستراتېژۍ یوه مهمه برخه ده چې د ښار د پرمختګ، ښاري نظم او د اوسېدونکو د ژوند د معیار لوړولو لپاره چمتو شوي دي.
