په کابل ښار کې د ښاري سرغړونو په موخه د ودانیو دوامداره څارنه ترسره شوه
۱۴۴۷/۰۷/۰۸
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، د ښاري سرغړونو ړ مخنیوي ټيمونه او د عامه پوهاوي تخنیکي ټیمونه د کابل ښار په جوړیدونکو ودانیو څارنه او نظارت ترسره کړ.
دغه څارنه د کابل ښار د درېیمې ناحیې بېلابېلو سیمو لکه دهبوري، گولایي دواخانه او پل سرخ کې ترسره شوه. د یادونې وړ ده چې د دوامداره څارنې پروسه د ریاست د پلان سره سم روانه ده او په راتلونکو ورځو کې به د ښار نورو سیمو کې هم څارنه ترسره شي.
د څارنې پر مهال هغو پروژو کې چې د قوانینو او تصویب شویو ښاري پلانونو څخه د احتمالي سرغړونو نښې لیدل شوي، د پروژو مالکینو څخه غوښتنه وشوه چې خپلې رسمي اسناد او جوازونه ریاست ته وړاندې کړي، تر څو د دقیقې څارنې او د پلانونو سره د مطابقت وروسته، په صورت کې د هر ډول سرغړونې قانوني اقدامات ترسره شي.
د دغو څارنو موخه د ښاري پلانونو سم تطبیق، د ډیر فشار یا تراکم مخنیوی، د ښاري ګډوډیو مخنیوی، د ودانیزو چارو کیفیت لوړول او د ښار د مدیریت ښه کول دي.
