د تالقان ښار د ودانیزو چارو د بهیر او ښاري پلان د تطبیق څارنه ترسره شوه
۱۴۴۷/۷/۳
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، د تخار ولایت د کور او ښار جوړولو ریاست محترم رئیس د اړوند ټیم په ملتیا د تالقان ښار د ودانیزو چارو او د تصویب شوي ښاري پلان د تطبیق څارنه وکړه.
د تخار ولایت د کور او ښار جوړولو ریاست محترم رئیس وویل، یاده څارنه د دې لپاره ترسره شوه چې ښاري پلانونه په سمه توګه عملي شي، د خپل سرو ودانیو مخه ونیول شي او د ودانیزو چارو کیفیت لوړ شي.
د نوموړي په خبره، د څارنې پر مهال له ویزه شوو ودانیو څخه لیدنه وشوه او مسؤلینو ته د انجنیري اصولو د مراعات کولو په اړه لازمې لارښوونې وشوې.
همدارنګه، د هغو ودانیزو چارو مخه ونیول شوه چې له قانوني اسنادو پرته پیل شوې وې او اړوند کسان د اسنادو د بشپړولو لپاره معرفي شول. د ښاري څارنې بهیر به د تصویب شوو پلانونو له مخې دوام ولري او د سرغړونو په صورت کې به قانوني چلند وشي.
د کور او ښار جوړولو وزارت د هېواد په ښارونو کې د منظمې ښاري پراختیا، د خپل سرو ودانیو د مخنیوي او د ښاري نظم د ټینګښت لپاره په دوامداره ډول د ودانیزو چارو څارنه کوي.
