په سرپل ولایت کې د ښاري سرغړونو مخنیوی ترسره شو
۱۴۴۷/۰۶/۱۲
د کور او ښار جوړولو وزارت د ښاري سرغړونو د مخنیوي عمومي ریاست د لارښوونې پر اساس، د سرپل ولایت د ښار جوړولو ریاست تخنیکي ټیم د لومړۍ ناحیې د ودانیزو چارو د قانوني وضعیت ارزونه ترسره کړه.
د سرپل ولایت د کور او ښار جوړولو ریاست محترم رئیس ملا محمد نور نوراني وایي چې د یادې کتنې هدف د ښاري نظم ساتنه، د ساختماني قوانینو تطبیق او د غیرقانوني جوړښتونو مخنیوی و.
د نوموړي په خبره، د څارنې په پایله کې په راسته حلبي سازۍ کې څو دوکانونه چې د ښار د پلان خلاف یې کار روان و، سمدستي ودرول شول او موضوع د سرپل له ښاروالۍ سره شریکه شوه.
همدارنګه یو شمېر نور دوکانونه چې د ویزې له قانوني نقشې پرته یې اعمار روان و، متوقف شول او مالکانو ته د ویزې د بشپړولو هدایت ورکړل شو.
په ورته وخت کې د چمن په کوڅه کې یو استوګنیز تعمیر هم پرته له ویزې په جوړېدو و چې کار یې درول شوی او مالک یې د قانوني اسنادو تر بشپړېدو پورې له هر ډول فعالیت منع شو.
د کور او ښار جوړولو وزارت په ټولو ولایتونو کې د ښاري نظم د ټینګښت او د غیرقانوني جوړښتونو د مخنیوي لپاره دوامدار څار او نظارتي پروګرامونه پلي کوي.
