کونړ کې زلزله ځپلو ته د نورو کورونو د جوړولو چارې هم پیل شوې
۱۴۴۷/۶/۱۱
کونړ کې د کور او ښار جوړولو ریاست محترم رئیس مولوي نبي الله طلحه وایي، په دې ولایت کې د زلزله ځپلو کورنیو لپاره د لس بابه نورو کورونو د جوړولو چارې هم پیل شوې.
ښاغلی مولوي طلحه وایي، دغه لس بابه کورونه به په شاوخوا یوه نیمه میاشت کې جوړ شي، چې شپږ اعشاریه اووه میلیونه افغانۍ لګښت پرې راځي.
نوموړی وایي، یاد کورونه د قدم په نوم خیریه بنسټ له لوري جوړېږي، چې نقشې یې د کور او ښار جوړولو وزارت له لوري ورکړل شوې دي.
محترم نبي الله طلحه وایي، هره خیریه اداره او نور چې په کونړ کې زلزله ځپلو ته کورونه جوړوي، له کور او ښار جوړولو ریاست څخه منل شوې نقشې غواړي چې دوی یې په واک کې ورکوي او عملاً په ساحه کې تطبیق کېږي.
دغه کورونه د کونړ نورګل ولسوالۍ مزار درې په ستره وال کلي کې د قدم خیریه بنسټ له لوري جوړېږي، چې د ا.ا.ا د کورونو جوړولو کمېټې له لوري یې چارې وخت په وخت څارل کېږي، ترڅو ټول کارونه د منل شوې نقشې له مخې ترسره شي.
د قدم خیریه بنسټ مسؤلینو ویلي، یاد کورونه به درې خونې ولري او د اوسېدو ټولې اسانتیاوې به په کې برابرې وي.
د معلوماتو له مخې، تر اوسه د کونړ ولایت د زلزله ځپلو لپاره په قبا ښارګوټي کې د اتیا کورونو چارې بشپړې شوې دي، په شپېته کورونو کار روان دی، د پنځه سوه کورونو د جوړېدو ژمنې شوې دي او تازه د لس کورونو د جوړولو د بنسټ ډبره کېښودل شوه.
