د ښاري چارو مرستیال د ملګرو ملتونو د زیربنايي پراختیا د پروژو د مسؤول سره وکتل
۱۰/۰۶/۱۴۴۷
د کور او ښار جوړولو وزارت د ښاري چارو محترم مرستیال شیخ مدار علي کریمي بامیاني په خپل کاري دفتر کې په کابل کې د ملګرو ملتونو د زیربنايي پراختیا پروژو د مسؤول کریستیان ډورفیل او د هغه د مل هیئت سره وکتل.
په پیل کې کریستیان ډورفیل، چې په کابل کې د ملګرو ملتونو د زیربنايي پراختیا د پروژو مسؤول دی، وویل چې د خصوصي سکتور له لارې د اوبو رسونې د خدمتونو د ارزونې او تحلیل په موخه وزارت ته راغلی دی، نوموړي زیاته کړه چې دوی چمتو دي له خصوصي پانګوالو سره په ګډه د کابل ښار د اوبو د خدمتونو د ښه کېدو لپاره کار وکړي.
هغه همدارنګه وویل چې دوی نړیوال بانک ته وړاندیز کړي، چې د خصوصي سکتور په همغږۍ د کابل ښار د اوبو ستونزه حل کړي او د دې برخه کې د وزارت نظرونه ډېر مهم دي.
وروسته محترم شیخ مدارعلي کریمي بامیاني، د ښه راغلاست ویلو تر څنګ، د اوبو مسئله د خلکو د ژوند د بقا لپاره خورا مهمه وبلله، په ځانګړي ډول د کابل ښار لپاره. هغه وویل چې د کور او ښار جوړولو وزارت له هر پانګوال سره په ټولو برخو کې، په ځانګړي ډول د کابل ښار د اوبو رسونې په برخه کې همکاري او ملاتړ کوي.
ښاغلي بامیاني له ټولو نړیوالو مؤسسو او نړیوال بانک څخه وغوښتل چې د افغانستان بنسټیزو پروژو ته ځانګړې پاملرنه ورکړي، او ټینګار یې وکړ چې د کور او ښار جوړولو وزارت اړوند ادارې ورسره هر اړخیزه همکاري کوي.
په دې ناسته کې، د کور او ښار جوړولو وزارت انجینرانو د کابل ښار اوسېدونکو ته د اوبو رسونې په اړه خپلې تخنیکي نظریې او وړاندیزونه په شفاهي او لیکلي بڼه وړاندې کړل او خپلې مسلکي مشورې یې شریکې کړې.
پریکړه وشوه چې په راتلونکي ناسته کې به د یادو موضوعاتو په اړه لا نور تخنیکي ارزونې ترسره شي او کارونه به د وزارت په همغږۍ او همکارۍ لا اغېزمن پرمخ ولاړ شي.
