کابل کې د صنعتي پارکونو د بدیلو ځمکو تخنیکي ارزونه ترسره شوه
۱۴۴۷/۰۵/۲۸
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني، له خپل مل پلاوي سره یو ځای چې پکې د صنعت او سوداګرۍ وزارت د صنعتي پارکونو عمومي رئیس الحاج محمد عارف حسن زاد، د کابل ښاروالۍ استازي، د کرنې، اوبولګولو او مالدارۍ وزارت د ځمکو برخې استازي، د اوبو او برېښنا استازي، او د کور او ښار جوړولو وزارت تخنیکي انجینران شامل وو، د تپې قوریغ سیمې څخه لیدنه وکړه او ساحه یې د هوايي کمرې له لارې وکتله.
تر دې وړاندې د کابل ولایت په یو شمېر سیمو کې، په ځانګړي ډول د کوه قوریغ په سویه، د سوداګریزو مرکزونو او صنعتي پارکونو د جوړولو لپاره سروې شوې وه. ټاکل شوي پلاوي د لیدنې وروسته د سیمې د قوتونو او کمزوریو په اړه خپل نظرونه وړاندې کړل او پرېکړه یې وکړه چې له هر اړخیزې ارزونې وروسته به د صنعتي پارکونو لپاره د ۷۰۰ جریبه بدیل ځمکې د اسلامي امارت د ریاست الوزرا د اقتصادي کمېسیون د مصوبې د ۸ مادې د ۵ بند له مخې د صنعت او سوداګرۍ وزارت ته وسپارل شي.
د پلاوي غړو په دې لیدنه کې ټینګار وکړ چې هغه سیمه باید وټاکل شي چې د کوچنیو صنایعو د پارکونو لپاره رښتینې ګټه ولري او تخنیکي وړتیا پکې موجوده وي، هغوی زیاته کړه چې د تپې قوریغ سیمه، چې د دیپلوماتي ښارګوټي شا ته موقعیت لري، د کابل د ښار ماسټر پلان له مخې د ساتنې سیمه ده او هېڅ ښاري ستونزه نه لري، نو ځکه د سپکو صنایعو د پارکونو لپاره خورا مناسبه او اغېزمنه بلل کېږي.
د یادونې وړ ده چې دا مهال د کوچنیو صنایعو لپاره دوه مناسبې سیمې وټاکل شوې دي. د کرنې وزارت د ځمکو ریاست له لوري د ۴۱ سیمو لېست پلاوي ته ورکړل شوی و، چې له هغې ډلې انجینرانو او ټاکل شوي پلاوي تر ټولو غوره دوه ځایونه چې یو د تپې قوریغ سیمه او بل د لته بند سيمه د بتخاک ولسوالۍ اړوند د کوچنیو صنایعو د پارکونو لپاره غوره کړي دي.
