د نیمروز په بندروالۍ او ۱۰۰ بستریز روغتون کې د مسجدونو د جوړېدو چارې وڅارل شوې
۱۴۴۷/۰۵/۲۴
د نیمروز ولایت د کور او ښار جوړولو ریاست محترم رئیس مولوي عبدالجبار یاسیني وایي، د دې ریاست اړوند تخنیکي ټیم د بندروالۍ په ساحه او د ۱۰۰ بستریز روغتون اړوند د مسجدونو د اعمار له چارو څخه تخنیکي لیدنه او څارنه وکړه.
ښاغلي مولوي یاسیني وویل، په بندروالۍ کې د مسجد شریف د محراب د جوړېدو کار روان و، چې پکې د تهداب کانکریټ اچونه، د بنسټ او پایو سیم تاوي، او دودانیزو موادو انتقال شامل وو، تخنیکي ټیم شرکت ته لارښوونه وکړه، څو د کار د چټکتیا لپاره د ماهرو کارګرانو شمېر زیات کړي او ټول کارونه د قرارداد او تخنیکي اسنادو له مخې ترسره کړي.
د نوموړي په خبر، د ۱۰۰ بستریز روغتون اړوند د مسجد شریف د ودانۍ د جوړېدو په پروژه کې د غرقې او کرسي د ډبرو کار، د مسجد شاوخوا پرانه او د موادو انتقال جریان درلود. قراردادي شرکت ته هدایت ورکړل شو چې د کار سرعت لوړ کړي او شګه او جغل د استعمال وړاندې ښه ووینځي، تر څو د کار کیفیت وساتل شي.
د کور او ښار جوړولو وزارت د هېواد په کچه د عامه پروژو د کیفیت د تضمین په موخه، د مسجدونو، روغتیایي او تعلیمي تاسیساتو له ودانیزو چارو څخه منظم تخنیکي څارنه کوي.
