په کابل ښار کې د قلعۀ کاشف سیمې د ښاري سرغړونو د مخنیوي څارنه وشوه
۱۴۴۷/۰۵/۱۷
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، د دې ریاست اړوند تخنیکي ټیم د کابل ښار د پنځمې ناحیې اړوند د قلعۀ کاشف سیمې د ښاري وضعیت د څار او ارزونې لیدنه ترسره کړه.
یاده څارنه د ښاري سرغړونو د ریاست د محترم رئیس د هدایت پر بنسټ، د نظارت او رسیدګي آمریت او د عامه پوهاوي آمریت د استازو په ګډه ترسره شوه.
ښاغلي مولوي حقاني وویل، په یادې سیمې کې دا مهال هېڅ نوې ودانۍ د جوړېدو په حال کې نه وې، خو د سیمې ډېری برخې غیرپلاني بڼه لري او د ښار د تفصیلي پلان پلي کېدل پکې په سمه توګه نه دي عملي شوي.
د نوموړي په خبره، چې د قلعۀ کاشف سیمه د ښاري نظم د بیا تنظیم او د تفصیلي پلان د نوې کتنې جدي اړتیا لري، تر څو د راتلونکو غیرپلاني جوړښتونو مخه ونیول شي او ښاري توازن وساتل شي.
د کور او ښار جوړولو وزارت د ښاري سرغړونو د مخنیوي ریاست د هېواد په بېلابېلو ښارونو کې د څارنې دوامداره پروګرامونه پرمخ وړي، څو د غیرپلاني جوړونو مخه ونیسي، د ښارونو نقشه معیاري کړي او د ښاري نظم د ټینګښت لپاره دوامدار اقدامات ترسره کړي.
